Farg'onada erini kaltaklagan ayol jarimaga tortildi
Sudda jabrlanuvchi erkak ayolga nisbatan qonuniy chora ko‘rilishini so‘ragan hamda uni kechirmasligini ma’lum qilgan.
Farg‘ona shahrida turmush o‘rtog‘iga tan jarohati yetkazgan ayol oilaviy zo‘ravonlikda aybli deb topildi. Zamon.uz sud hujjatlari bilan tanishdi.
Ma’lum qilinishicha, 1999-yilda tug‘ilgan M.A. 2026-yil 20-fevral kuni turmush o‘rtog‘i bilan oilaviy kelishmovchilik sabab janjallashgan. Janjal vaqtida ayol eri M.S.ga qo‘li bilan urib, tan jarohati yetkazgan.
Sudda ayol aybiga iqrorlik bildirgan. Uning ko‘rsatmasiga ko‘ra, avvalroq farzandlarini aylantirish masalasida er-xotin o‘rtasida tortishuv yuzaga kelgan. Oradan ikki kun o‘tib mojaro yana davom etgan va navbatdagi janjal vaqtida u o‘zini himoya qilish maqsadida turmush o‘rtog‘ini itarib yuborganini bildirgan.
Jabrlanuvchi erkak esa suddan ayolga nisbatan qonuniy chora ko‘rishni so‘ragan hamda uni kechirmasligini ma’lum qilgan.
JIB Farg‘ona shahar sudi hukmiga ko‘ra, M.A. Jinoyat kodeksining 126-1-moddasi 2-qismida nazarda tutilgan oilaviy zo‘ravonlik jinoyatini sodir etganlikda aybli deb topilgan. Unga BHMning 20 baravari — 8 million 240 ming so‘m miqdorida jarima jazosi tayinlangan.
Shuningdek, jabrlanuvchiga moddiy va ma’naviy zarar undirish masalasida fuqarolik sudiga murojaat qilish huquqi tushuntirilgan.
