Isroil Eronga qarshi yangi operatsiya o'tkazishga tayyorlanmoqda — CNN
Tel-Avivda Tehron diplomatik pauzadan foydalanib vaqt yutishga urinmoqda degan xavotir kuchaymoqda.
Isroil siyosiy rahbariyati orasida Eronga qarshi harbiy operatsiyalarni tez orada qayta boshlash tarafdori ekanligi haqidagi fikr tarqalmoqda, deb xabar berdi CNN 21-may kuni Isroil hukumati manbalariga tayanib.
Ma'lum qilinishicha, Tehron diplomatik pauzadan foydalanib vaqt yutishga urinmoqda degan xavotir Tel-Avivda kuchaygan. Shu sababli Isroil hukumatining yuqori doiralarida Eronga qarshi harbiy harakatlarni qayta tiklash istagi saqlanib qolayotgani ta’kidlangan.
Manbalarga ko‘ra, yaqinda AQSH prezidenti Donald Tramp va Isroil bosh vaziri Benyamin Netanyaxu o‘rtasida telefon orqali bo‘lib o‘tgan suhbat keskin ruhda o‘tgan. Xabarda qayd etilishicha, Netanyaxu hozirgi diplomatik pauza faqat Eron manfaatlariga xizmat qilmoqda deb hisoblamoqda.
Avvalroq Donald Tramp Qatar, BAA va Saudiya Arabistoni iltimosiga binoan Eronga qarshi ehtimoliy harbiy harakatlarni vaqtincha kechiktirishga qaror qilganini bildirgan edi. AQSH rahbari, shuningdek, Eron bilan diplomatik kelishuvga erishish imkoniyati saqlanib qolayotganini ham ta’kidlagan.
