“Oxirigacha kurashing”: Prezident terma jamoaga murojaat qildi
Shavkat Mirziyoyev futbolchilarni hech kimdan hayiqmasdan, bosimsiz o‘ynashga chaqirdi.
Prezident Shavkat Mirziyoyev futbol bo‘yicha O‘zbekiston milliy terma jamoasi bilan uchrashuvda futbolchilarni jahon chempionati oldidan qo‘llab-quvvatlab, ularni bosimsiz va mardonavor o‘ynashga chaqirdi.
Davlat rahbari mundialda oson o‘yin bo‘lmasligini ta’kidlab, O‘zbekiston terma jamoasi Portugaliya, Kolumbiya va Kongo kabi kuchli jamoalarga qarshi maydonga tushishini qayd etdi.
Prezident xalq har bir uchrashuvda g‘alaba kutishi tabiiyligini, biroq futbolchilar tarixiy natijaga allaqachon erishib bo‘lganini ta’kidladi.
“Sizlar tarixni allaqachon yaratib bo‘ldingiz”, — dedi Shavkat Mirziyoyev.
Davlat rahbari futbolchilardan oldindagi muhim o‘yinlarda ortiqcha bosimsiz, hech kimdan hayiqmay, bor imkoniyatlarini ishga solib o‘ynashni so‘radi.
“Har bir to‘p, har bir vaziyat, maydonning har bir qarichi uchun oxirigacha kurashing!” — dedi Prezident.
Prezidentning ta’kidlashicha, mundial uchrashuvlarida fan-klublar, minglab muxlislar hamda AQShdagi vatandoshlar stadionlardan turib terma jamoani qo‘llab-quvvatlaydi.
Davlat rahbari, shuningdek, jamoaning har bir harakatini qariyb 40 million aholining katta hayajon bilan kuzatishini bildirib, futbolchilarga xalq va davlat rahbari ularga ishonishini aytdi.
“Boringlar, mardonavor o‘ynanglar, Vatan sharafini munosib himoya qilinglar”, — dedi Shavkat Mirziyoyev so‘zining yakunida.
