Bu yil ko‘p yomg‘ir yog‘di, muammo aniq bo‘ldi — Samarqand viloyati hokimi
Samarqand ko‘chalarini suv bosdi. Viloyat hokimi ushbu holat qayta takrorlanmasligi uchun tizimli choralar ko‘rish bo‘yicha topshiriq berdi.
23-may kuni Samarqand viloyatining qator hududlarida kuzatilgan kuchli yomg‘ir oqibatida ayrim ko‘chalarda suv to‘planishi va toshqin holatlari yuzaga keldi. Bu haqda viloyat hokimligi axborot xizmati xabar berdi.
Ma’lum qilinishicha, viloyat hokimi Adiz Boboyev vaziyatni joyiga chiqib o‘rganish maqsadida tegishli tashkilotlar vakillari bilan birgalikda Samarqand shahridagi Chuquryo‘l ko‘chasida bo‘ldi.
Hududda suv to‘planishini bartaraf etish, suv oqizish tizimini yaxshilash hamda bunday holatlar takrorlanishining oldini olish yuzasidan mas’ullarga topshiriqlar berildi.
“Yana 4−5 kun yomg‘ir bor, yomg‘ir tugashi bilan ishni darhol boshlaysizlar. Birdaniga 4−5 ta joyga texnika qo‘yamiz, 2 ta 1600 talik quvur bilan suvni to‘liq soyga chiqarib yuborishimiz kerak. Bu nima degan ahvol? Yurishning umuman iloji yo‘q-ku. Ishni boshlash kerak”, — dedi hokim.
Bundan tashqari hokim Samarqand shahrining Namozgoh ko‘chasiga ham bordi. Qayd etilishicha, ushbu hududdan o‘tuvchi Maroqand arig‘ining yo‘li turli chiqindilar va tiqinlar bilan to‘silib qolgan. Bu esa yomg‘ir suvlarining ko‘chaga toshib chiqishiga sabab bo‘lgan. Hozirda u yerda ham tegishli ishlar olib borilmoqda.
Hokim mas’ul idoralar va kommunal xizmatlar vakillariga bunday holatlarning kelgusida takrorlanmasligi uchun tizimli choralar ko‘rish, ayniqsa suv oqimlari yo‘llarini doimiy nazoratda ushlash hamda suv yo‘llarini tozalash ishlarini kuchaytirish bo‘yicha topshiriqlar berdi.
“Bu yil ko‘p yomg‘ir yog‘di, muammo aniq bo‘ldi. Keyingi yil ham shunday bo‘lishi mumkin. Endi bunaqa holat takrorlanmasligi uchun shaharni bir marta to‘liq inventarizatsiya qilasizlar. Qayerda shunday muammo bo‘lsa, birorta joy qolmasin. Qancha mablag‘ kerak bo‘lsa, qayta ko‘rib chiqamiz va hammasini yangidan qilamiz”, — dedi Adiz Boboyev.
Ma’lumotlarga ko‘ra, Samarqand shahrida suv to‘planish holatlarini bartaraf etish maqsadida Favqulodda vaziyatlar boshqarmasining suv tortuvchi 20 dan ortiq maxsus texnikasi jalb etilgan.
