25-may kuni davlat tashkilotlari va idoralari xodimlariga xizmat avtomashinalaridan foydalanish taqiqlanadi

25-may kuni O‘zbekistonning barcha hududlarida “Avtomobilsiz kun” aksiyasi o‘tkaziladi. Bu haqda Prezidentning 2026-yil 25-martdagi “Toza havo” umummilliy loyihasini amalga oshirish chora-tadbirlari to‘g‘risidagi farmonida belgilangan.

 

Hujjatga ko‘ra, 2026-yil 1-maydan boshlab har oyning 10 va 25-sanalarida “Avtomobilsiz kun” hamda “Avtomobilsiz hafta” aksiyalari o‘tkazib boriladi.

 

Qayd etilishicha, aksiya kunlari davlat tashkilotlari va idoralari xodimlariga xizmat avtotransport vositalaridan foydalanish qat’iyan taqiqlanadi. Agar mazkur sanalar ish kuniga to‘g‘ri kelsa, haydovchilarning ish haqi saqlab qolinadi.

 

Shuningdek, maxsus komissiya bayoniga muvofiq, davlat fuqarolik xizmatchilari tomonidan aksiya doirasida xizmat avtomobillaridan foydalanish odob-axloq qoidalarini buzish sifatida baholanadi. Belgilangan talablarga amal qilmaslik esa mas’ul rahbarlarga xodimlarni intizomiy javobgarlikka tortish uchun asos bo‘ladi.

 

Ekoqo‘mitaning ma’lum qilinishicha, tashabbus atmosfera havosiga chiqariladigan zararli gazlar miqdorini kamaytirish, aholi salomatligini muhofaza qilish, ekologik barqaror muhitni shakllantirish hamda jamoat transporti va ekologik toza transport vositalaridan foydalanish madaniyatini ommalashtirishga qaratilgan.

 

Shu bilan birga, aksiya doirasida targ‘ibot tadbirlari, ommaviy yurishlar va jamoatchilik aksiyalari ham tashkil etilishi rejalashtirilgan.