O‘zbekistonda tadbirkorlar uchun soliqlar yengillashadi, tekshiruvlar tartibi soddalashtiriladi
2026-yil 1-iyundan kichik biznes uchun umumiy soliq rejimiga o‘tishdagi chegaraviy miqdorni 1 milliard so‘mdan 5 milliard so‘mga oshirish taklif qilindi.
2026-yil 1-iyundan O‘zbekistonda kichik biznes uchun soddalashtirilgan soliq rejimi chegarasi kengaytirilishi, bir qator soliq yengilliklari joriy etilishi hamda tekshiruvlar va ma’muriy jarayonlar qisqartirilishi kutilmoqda. Prezident Shavkat Mirziyoyev kichik biznes subyektlari o‘sishi uchun yanada qulay iqtisodiy va ma’muriy sharoitlar yaratishga qaratilgan takliflar taqdimoti bilan tanishdi.
Taqdimotga ko‘ra, kichik biznes uchun soddalashtirilgan soliq rejimi chegarasi 1 milliard so‘mdan 5 milliard so‘mga oshirilishi rejalashtirilmoqda. Bu o‘zgarish ko‘plab tadbirkorlarning QQS va foyda solig‘iga erta o‘tish jarayonini yengillashtirishi hamda faoliyatni kengaytirish imkonini berishi kutilmoqda.
Shuningdek, umumiy ovqatlanish, savdo va xizmat ko‘rsatish sohalari uchun 6 foizlik soddalashtirilgan QQS tartibi joriy etilishi ko‘zda tutilgan. Past xavfli tadbirkorlar uchun QQS qaytarish jarayoni to‘liq avtomatlashtiriladi.
Amaldagi tartiblarga muvofiq, QQS guvohnomasini vaqtincha to‘xtatish amaliyoti bekor qilinishi, soliq auditi hamda sayyor tekshiruvlarga cheklovlar joriy etilishi rejalashtirilmoqda. Bundan tashqari, bank hisobvaraqlarini ochish va ayrim moliyaviy jarayonlarni raqamlashtirish choralari ham amalga oshiriladi.
Kichik biznes subyektlariga nisbatan ma’muriy bosimni kamaytirish maqsadida tadbirkorga xatolarni mustaqil tuzatish imkoniyatini berish hamda soliq xavfi 500 million so‘mgacha bo‘lgan holatlarda soliq auditi, 100 million so‘mgacha bo‘lganda esa sayyor soliq tekshiruvini o‘tkazmaslik tartibini joriy etish taklif qilindi.
Qayd etilishicha, ushbu islohotlarning asosiy maqsadi kichik biznesni “soya” iqtisodiyotidan chiqarish, aylanmani yashirish ehtiyojini kamaytirish hamda tadbirkorlar uchun adolatli va soddalashtirilgan biznes muhitini yaratishdan iborat.
Hisob-kitoblarga ko‘ra, yangi yengilliklar 600 mingdan ortiq kichik biznes subyektining qonuniy ravishda kengayishiga xizmat qilishi kutilmoqda.
