Rossiya armiyasi Kiyevga tizimli zarbalar berishni boshlaydi — Lavrov
Lavrov va Rubio Ukraina mojarosi hamda diplomatik aloqalarni muhokama qildi.
Rossiya tashqi ishlar vaziri Sergey Lavrov va AQSH davlat kotibi Marko Rubio o‘rtasida telefon orqali muloqot bo‘lib o‘tdi. Tomonlar Ukraina mojarosi, Hormuz bo‘g‘ozidagi vaziyat hamda Rossiya va AQSH diplomatik vakolatxonalari faoliyati masalalarini muhokama qildi. Bu haqda Rossiya TIV xabar berdi.
Rossiya Tashqi ishlar vazirligi ma’lum qilishicha, suhbat davomida Sergey Lavrov AQSH tomoniga Rossiya Prezidenti Vladimir Putin topshirig‘iga ko‘ra, Kiyev rejimining Rossiya hududidagi tinch aholi va fuqarolik obyektlariga qarshi davom etayotgan hujumlariga javoban Rossiya Qurolli Kuchlari Kiyevdagi Ukraina Qurolli Kuchlari ehtiyojlari uchun foydalanilayotgan obyektlar hamda qaror qabul qilish markazlariga tizimli zarbalar berishni boshlayotgani haqida ma’lumot yetkazgan.
Lavrov 25-may kuni Rossiya Tashqi ishlar vazirligi tarqatgan bayonotni ham eslatib, unda AQSH va Kiyevda vakolatxonalari mavjud boshqa davlatlarga diplomatik xodimlari hamda fuqarolarini Ukraina poytaxtidan evakuatsiya qilish tavsiya etilganini bildirgan.
Shuningdek, Rossiya tomoni 2025-yil avgust oyida AQSH tashabbusi bilan Ankorijda Ukraina mojarosi yuzasidan erishilgan kelishuvlarni eslatib, Yevropa elitalari va Kiyevning harakatlari ushbu kelishuvlarga putur yetkazayotganini qayd etgan.
Suhbat davomida tomonlar Hormuz bo‘g‘ozidagi inqirozni bartaraf etishga qaratilgan diplomatik tashabbuslar hamda Kuba atrofidagi vaziyat yuzasidan ham fikr almashgan.
Ma’lum qilinishicha, Sergey Lavrov va Marko Rubio mavjud kelishmovchiliklarga qaramay, Rossiya va AQSH diplomatik vakolatxonalari faoliyati uchun sharoitlarni normallashtirish bo‘yicha sa’y-harakatlarni kuchaytirishga tayyor ekanini tasdiqlagan.
