Rossiya Davlat dumasi mamlakatni tark etgan fuqarolarning mol-mulkini xatlashga ruxsat berdi
Endilikda ayrim ma’muriy ishlar bo‘yicha jarimani undirish uchun xorijdagi rossiyaliklarning bank hisoblari va boshqa aktivlariga cheklov qo‘yilishi mumkin.
Rossiya Davlat dumasi mamlakatni tark etgan fuqarolarning mol-mulkini xatlashga ruxsat beruvchi qonunni qabul qildi. Hujjat 26-may kuni ikkinchi va uchinchi o‘qishda bir ovozdan ma’qullandi. Qonun 1-sentyabrdan kuchga kiradi, deya xabar bermoqda DW.
Qonunga ko‘ra, Rossiyadan chiqib ketgan fuqarolarning mol-mulki ayrim ma’muriy huquqbuzarliklar bo‘yicha jarimalarni undirishni ta’minlash maqsadida xatlanishi mumkin.
Gap Ma’muriy javobgarlik to‘g‘risidagi kodeksning 10 dan ortiq moddasi haqida bormoqda. Ular orasida “xorijiy agent” faoliyati qoidalarini buzish, “ekstremistik materiallar”ni tarqatish, Rossiya armiyasini “diskreditatsiya qilish”, “nomaqbul tashkilotlar” faoliyatida ishtirok etish hamda “feyklar” tarqatish bilan bog‘liq moddalar bor.
Hujjatga muvofiq, undiruv avvalo bank hisoblari va omonatlardagi mablag‘larga qaratiladi. Mablag‘ yetarli bo‘lmagan taqdirda boshqa mol-mulk xatlanadi. Shu bilan birga, sud mol-mulkni ish bo‘yicha yakuniy qaror chiqishidan oldin ham xatlashga ruxsat berishi mumkin.
Qonunda sudya huquq-tartibot organlarining mol-mulkni xatlash haqidagi iltimosnomasini bir kun ichida va mulk egasini xabardor qilmasdan ko‘rib chiqishi belgilangan.
Avvalroq Rossiya parlamenti prezident Vladimir Putinning xorijda qurolli kuchlardan foydalanish vakolatlarini kengaytiruvchi yana bir qonunni ham qabul qilingan edi. Unga ko‘ra, Rossiya fuqarolari rossiyaliklar ta’qibga uchrayotgan mamlakatlarga Kreml qo‘shin kiritishi mumkin bo‘ladi.
