“Toshkent – Samarqand” yangi avtomobil yo‘lida 60 ta tunelli o‘tish joyi quriladi
Ushbu yo‘lning umumiy uzunligi 282 kilometr bo‘lib, loyihaviy tezlik 150 kmni tashkil qiladi.
Prezident Shavkat Mirziyoyev transport infratuzilmasini rivojlantirishga doir taqdimot bilan tanishib, “Toshkent – Samarqand” muqobil avtomobil yo‘li loyihasi va uning texnik yechimlari yuzasidan topshiriqlar berdi.
Taqdimotda qayd etilishicha, transport infratuzilmasi iqtisodiyot tarmoqlarini o‘zaro bog‘lash, hududlar salohiyatini to‘liq ishga solish hamda aholi va biznes uchun qulaylik yaratishda muhim ahamiyatga ega.
Shu bois mamlakatda avtomobil yo‘llari, aviatsiya, logistika va xalqaro transport yo‘laklarini rivojlantirishga alohida e’tibor qaratilmoqda.
Asosiy loyiha sifatida “Toshkent – Samarqand” muqobil avtomobil yo‘li qurilishi ko‘rib chiqildi. Ushbu yo‘lning umumiy uzunligi 282 kilometr bo‘lib, u Toshkent, Sirdaryo, Jizzax va Samarqand viloyatlarini bog‘laydi.
Loyiha I-a toifali, sement-beton qoplamali va har ikki yo‘nalishda uch tasmali harakat yo‘lagi sifatida barpo etilishi rejalashtirilgan. Yo‘lning loyihaviy tezligi soatiga 150 kilometrni tashkil etadi.
Loyiha doirasida 12 ta transport yechimi, 60 ta tunnelli o‘tish joyi, 91 ta ko‘prik, 16 ta yo‘l o‘tkazgich, 258 ta drenaj inshooti va intellektual transport tizimini joriy etish ko‘zda tutilgan.
Bundan tashqari, loyiha doirasida 12 ta terminal, yo‘l bo‘yi infratuzilmasi va vazn o‘lchash tizimlari tashkil etilishi rejalashtirilgan.
Davlat rahbari salohiyatli investorlar bilan muzokaralarni jadallashtirish hamda qurilish ishlarini qisqa muddatlarda boshlash bo‘yicha topshiriqlar berdi.
