Zelenskiy Yevropa Ittifoqi bilan birgalikda 120 shaxs va tashkilotga qarshi cheklovlarni kuchga kiritdi

Ukraina prezidenti Vladimir Zelenskiy ikki farmonni imzolab, Milliy xavfsizlik va mudofaa kengashining Yevropa Ittifoqi sanksiyalari bilan muvofiqlashtirish to‘g‘risidagi qarorini kuchga kiritdi. Bu haqda Ukraina prezidenti devoni ma’lum qildi.

 

Rasmiy bayonotga ko‘ra, Yevropa Ittifoqining 20-sanksiya paketi doirasida amalga oshirilgan muvofiqlashtirish 120 nafar shaxs va tashkilotni qamrab oladi hamda Rossiya iqtisodiyotining asosiy tarmoqlariga yo‘naltirilgan iqtisodiy cheklovlarni o‘z ichiga oladi.

 

Qayd etilishicha, yangi sanksiyalar Rossiya, Belarus, BAA, Qirg‘iziston, Qozog‘iston, O‘zbekiston hamda Rossiya tomonidan bosib olingan hududlarda faoliyat yuritayotgan jami 16 nafar jismoniy shaxs va 31 ta kompaniyaga nisbatan qo‘llaniladi. Shuningdek, Eronning 19 nafar fuqarosi va 11 ta kompaniyasi ham sanksiyalar ro‘yxatiga kiritilgan.

 

Sanksiyalar ro‘yxatiga Rossiyaning strategik korxonalari rahbarlari, byudjet muassasalari vakillari, armiyaning ayrim bo‘linmalari hamda vaqtincha bosib olingan hududlarda Rossiya manfaatlariga xizmat qilayotgan shaxslar kiritilgan.

 

Bundan tashqari, ro‘yxatdan Rossiya harbiy-sanoat majmuasi korxonalari, radioelektron kurash tizimlari ishlab chiqaruvchilari, dronlar uchun dasturiy ta’minot va ehtiyot qismlar ishlab chiqaruvchi kompaniyalar, shuningdek neft, gaz va oltin qazib olish bilan shug‘ullanuvchi korxonalar ham o‘rin olgan.

 

Xususan, aerokosmik mahsulotlar va dron komponentlari ishlab chiqaruvchi “Atlant Aero” hamda aloqa tizimlari va BPLA uchun ehtiyot qismlar ishlab chiqaruvchi “IRZ-Svyaz” kompaniyalariga nisbatan cheklovlar joriy etilgan.

 

Shuningdek, BAAdagi ayrim kompaniyalar — laboratoriya uskunalari, kimyoviy mahsulotlar hamda tijorat samolyotlari uchun ehtiyot qismlar yetkazib beruvchi tashkilotlar ham sanksiyalar ostiga tushgan. Belarusdagi neft eksport qiluvchi kompaniyaga ham cheklovlar qo‘llanilgan.

 

Ukraina uch nafar Rossiya fuqarosiga ham sanksiyalar joriy qildi. Ular orasida prokuror Lyudmila Balandina, sudya Dmitriy Gordeev hamda targ‘ibotchi Mariya Sittel bor. Ular repressiyalar va dezinformatsiya tarqatish bilan bog‘liq faoliyatda ayblangan.

 

Shuningdek, Eronning 19 fuqarosi va 11 kompaniyasi ham sanksiyalar ro‘yxatiga kiritilgan bo‘lib, ular Eronning ballistik raketalar va dronlar ishlab chiqarish dasturlari bilan bog‘liq faoliyat yuritadi.

 

Ukraina prezidentining sanksiyalar siyosati bo‘yicha vakili Vladislav Vlasyukning aytishicha, Kiyev Yevropa Ittifoqi va hamkorlar bilan sanksiya rejimlarini uyg‘unlashtirishni davom ettirmoqda hamda Rossiya va uni qo‘llab-quvvatlayotganlarga bosimni kuchaytirish rejalashtirilgan. U, shuningdek, Yevropa Ittifoqining 21-sanksiya paketi ustida ham ish olib borilayotganini bildirgan.