Shavkat Mirziyoyev Turkiyadagi avtobus halokati munosabati bilan Erdog‘anga hamdardlik bildirdi
Denizli viloyatida yo‘lovchi avtobusi ishtirokidagi halokat oqibatida 8 kishi halok bo‘ldi, 33 kishi jarohatlandi.
O‘zbekiston prezidenti Shavkat Mirziyoyev Turkiyaning Denizli viloyatida sodir bo‘lgan yo‘l-transport hodisasi oqibatida insonlar halok bo‘lgani va jarohatlangani sabab Turkiya prezidenti Rejep Tayyip Erdog‘anga hamdardlik yo‘lladi. Bu haqda O‘zbekiston prezidenti matbuot kotibi xabar berdi.
Davlat rahbari halok bo‘lganlarning oila a’zolari va yaqinlariga chuqur ta’ziya bildirib, jabrlanganlarning tez fursatda sog‘ayib ketishini tilagan.
Fojia Denizli viloyatining Sarayko‘y tumanida yuz bergan. Yo‘lovchi avtobusining yo‘l to‘sig‘iga urilishi ortidan transport vositasida yong‘in kelib chiqqan.
Turkiya OAVlari ma’lumotlariga ko‘ra, hodisa oqibatida 8 kishi, jumladan 9 oylik chaqaloq halok bo‘lgan, yana 33 kishi turli darajada tan jarohati olgan.
Dastlabki ma’lumotlarga ko‘ra, avtobus haydovchisi halokatdan taxminan 20 daqiqa oldin transport vositasidagi nosozlik sabab yo‘l chetida to‘xtab, texnik holatini tekshirgan. Shundan so‘ng safarni davom ettirgan, biroq ko‘p o‘tmay avtobus halokatga uchragan.
