AQSHda yuqori malakali mutaxassislar uchun “Grin karta” jarayoni yengillashtirildi
Endilikda mutaxassislar ariza topshirish uchun mamlakatni tark etishga majbur bo‘lmaydi.
AQSh yashil karta (doimiy yashash huquqi) olish uchun ariza topshirayotgan yuqori malakali mutaxassislar bo‘yicha talablarni yumshatdi.
Bloomberg agentligining AQSh Ichki xavfsizlik vazirligiga tayanib xabar berishicha, yashil karta olish uchun murojaat qilayotgan malakali mutaxassislarga ariza topshirish maqsadida AQSh hududini tark etish talabi tatbiq etilmaydi.
Qayd etilishicha, vazirlik avvalroq doimiy rezidentlik maqomini olishni istagan aksariyat vaqtinchalik chet el fuqarolari yashil karta rasmiylashtirish jarayonini davom ettirish uchun o‘z mamlakatlariga qaytishi kerakligini bildirgan edi.
Yangi bayonotga ko‘ra, malakali va talabga javob beradigan arizachilar uchun bunday cheklovlar qo‘llanilmaydi hamda ushbu o‘zgarishlar munosib nomzodlarning yashil karta olish imkoniyatlarini cheklamaydi. Shu bilan birga, ayrim toifadagi murojaatchilar hujjatlarni rasmiylashtirish jarayonini AQShning xorijdagi diplomatik vakolatxonalari orqali boshlashlari talab etilishi mumkin.
Ta’kidlanishicha, mazkur o‘zgarishlar amaldagi doimiy qonuniy yashash huquqiga ega bo‘lgan shaxslarga ta’sir qilmaydi.
