Eron prezidenti iste’foga chiqadimi?
Mamlakat rasmiylari Masud Pezeshkianning iste’fosi haqida tarqalgan xabarlarga izoh berdi.
Eron prezidenti Masud Pezeshkianning iste’foga chiqishi haqida tarqalgan xabarlar rasmiy ravishda rad etildi.
Eron prezidenti ma’muriyati kommunikatsiyalar bo‘limi boshlig‘i o‘rinbosari Mehdi Tabatabaiy ijtimoiy tarmoqlardagi bayonotida ushbu ma’lumotlarni “asossiz mish-mishlar” deb atadi.
Uning ta’kidlashicha, ayrim xorijiy ommaviy axborot vositalarida tarqalgan xabarlar haqiqatga zid bo‘lib, ularni siyosiy maqsadlarda tarqatilgan dezinformatsiya sifatida baholash mumkin.
“Bu kabi xabarlar sharmandali xorijiy tarmoqlarning g‘iybatlariga asoslangan. Ular haqiqatni emas, balki o‘z istaklarini e’lon qilmoqda. Prezident xalqiga xizmat qilishni davom ettiradi”, — degan Tabatabaiy.
Shuningdek, Eron hukumati axborot siyosati kengashi raisi Elias Hazrati ham Pezeshkianning iste’fosi haqidagi ma’lumotlarni rad etib, ularning asossiz ekanini tasdiqlagan.
Ma’lumot uchun, avvalroq ayrim xorijiy media manbalarida prezident Pezeshkian Oliy rahbariyatga iste’fo xati yuborgani haqida xabarlar tarqalgan edi. Biroq Eron rasmiylari bu da’volarni inkor etgan.
