Prezident “Kmita Polymers” korxonasidagi ishlab chiqarish jarayonlari bilan tanishdi
Korxonada yiliga 9,5 million dollarlik import o‘rnini bosuvchi polimer mahsulotlar ishlab chiqarilmoqda.
Prezident Shavkat Mirziyoyev Toshkent viloyatidagi “Chirchiq” kimyo-industrial texnoparkida faoliyat yuritayotgan “Kmita Polymers” korxonasiga tashrif buyurib, ishlab chiqarish jarayonlari va korxonaning istiqboldagi rejalari bilan tanishdi.
Rossiyaning “Polymers” kompaniyasi bilan hamkorlikda tashkil etilgan korxona maxsus va keng assortimentdagi polietilen hamda termoqisqaruvchi plyonka mahsulotlari ishlab chiqarishga ixtisoslashgan. Mazkur mahsulotlar oziq-ovqat, farmatsevtika, qurilish materiallari, maishiy texnika va boshqa sanoat tarmoqlarida qadoqlash vositasi sifatida keng qo‘llaniladi.
Korxonada Italiyaning zamonaviy texnologik uskunalari asosida ishlab chiqarish yo‘lga qo‘yilgan bo‘lib, u 6 ming 670 kvadrat metr maydonni egallaydi. Loyiha doirasida import o‘rnini bosuvchi mahsulotlar ishlab chiqarish yo‘lga qo‘yilib, yiliga 9,5 million dollarlik mahsulotlarni mahalliylashtirish imkoniyati yaratilgan.
Umumiy qiymati 15,2 million dollarga teng bo‘lgan loyiha ikki bosqichda amalga oshirilmoqda. Birinchi bosqichda 7,4 million dollar investitsiya o‘zlashtirilib, 50 ta yangi ish o‘rni yaratildi. Kelgusida korxona quvvatlari kengaytirilishi va qo‘shimcha ish o‘rinlari tashkil etilishi rejalashtirilgan.
Ma’lum qilinishicha, 2025-yilda korxonada 115 milliard so‘mlik mahsulot ishlab chiqarilgan. Shuningdek, 6 million dollarlik mahsulot Markaziy Osiyo mamlakatlariga eksport qilingan.
Bugungi kunda korxona mahsulotlari Coca-Cola, Pepsi, Flash, Chernogolovka, Ackerman, Asl Oyna, Biolife va Family Group kabi yirik brendlarning qadoqlash tizimlarida mahalliy xomashyo sifatida qo‘llanilmoqda.
Tashrif davomida qadoqlash sanoati zamonaviy iqtisodiyotning muhim va tez rivojlanayotgan yo‘nalishlaridan biri ekani ta’kidlandi. Bunday korxonalar nafaqat sanoat ishlab chiqarishini rivojlantirish, balki oziq-ovqat, farmatsevtika, qurilish va qishloq xo‘jaligi tarmoqlarining barqaror faoliyatini ta’minlashda ham muhim o‘rin tutishi qayd etildi.
