Qashqadaryoda 9 yoshli bolani daryodan qutqargan FVV xodimi taqdirlandi
Mayor Husniddin Sharapovga "Aʼlo xizmatlari uchun" koʻkrak nishoni va pul mukofoti topshirildi.
Favqulodda vaziyatlar vaziri Azizbek Ikramov Qashqadaryo viloyati Favqulodda vaziyatlar boshqarmasi xodimi, mayor Husniddin Sharapovni jasorat va fidokorona xizmatlari uchun “A’lo xizmatlari uchun” ko‘krak nishoni hamda pul mukofoti bilan taqdirladi. Bu haqda vazirlik matbuot xizmati xabar berdi.
Mazkur mukofot joriy yilning 23-may kuni Qashqadaryo viloyati Kitob tumani “Bog‘bon” mahallasi hududidan oqib o‘tuvchi Qashqadaryo daryosida sodir bo‘lgan favqulodda holat chog‘ida ko‘rsatilgan qahramonlik munosabati bilan topshirilgan.
9 yoshli bola velosiped minib ketayotib, muvozanatni yo‘qotgan holda daryoga tushib ketgan. Vaziyatni tezkor baholagan mayor zudlik bilan suvga sakrab, bolani qutqarib qolgan edi.
Uning jasorati va xizmatdagi fidoyiligi yuqori baholanib, Favqulodda vaziyatlar vaziri tomonidan davlat mukofoti hamda rag‘batlantiruvchi pul mukofoti topshirilgan.
