Farg‘onada fermer xo‘jaligi suv havzasida bir kishi cho‘kib ketdi
Membranali qoplamali suv havzalari atrofi maxsus panjaralar bilan o‘ralishi, favqulodda holatlarda foydalanish uchun qutqaruv arqonlari o‘rnatilishi ta’kidlandi.
Farg‘ona viloyatining Bag‘dod tumanida joylashgan fermer xo‘jaligidagi suv havzasida bir kishi cho‘kib ketdi. Bu haqda Favqulodda vaziyatlar vazirligi ma’lum qildi.
Ma’lum qilinishicha, hodisa 3-iyun kuni sodir bo‘lgan. Fuqaro membranali qoplamali suv havzasida cho‘kib halok bo‘lgan.
FVVga ko‘ra, avvalgi yillarda ham shu turdagi suv havzalarida bir necha bor cho‘kish holatlari qayd etilgan. Shu munosabat bilan vazirlik mutaxassislari bunday suv rezervuarlaridan foydalanishda xavfsizlik talablariga qat’iy rioya qilish zarurligini eslatdi.
Ta’kidlanishicha, membranali qoplamali suv havzalari atrofi maxsus panjaralar bilan o‘ralishi, shuningdek, favqulodda holatlarda foydalanish uchun qutqaruv arqonlari o‘rnatilishi lozim.
Favqulodda vaziyatlar vazirligi fuqarolarni hushyor bo‘lishga hamda suv havzalari yaqinida xavfsizlik qoidalariga amal qilishga chaqirdi.
