Hindistonda mehmonxona yonib ketti, 21 kishi halok bo‘ldi
Yong‘in binoning birinchi qavatida joylashgan restoranda boshlangan.
Hindistonning Nyu-Dehli shahrida mehmonxonada yuz bergan yong‘in oqibatida kamida 21 kishi halok bo‘ldi. Bu haqda Press Trust of India nashri ma’lum qildi.
Voqea 3-iyun kuni poytaxtning Malviya Nagar hududida joylashgan besh qavatli mehmonxonada sodir bo‘lgan. Dastlabki ma’lumotlarga ko‘ra, yong‘in binoning birinchi qavatida joylashgan restoranda boshlangan va tez orada yuqori qavatlarga ham tarqalgan.
Rasmiylarning bildirishicha, hodisa vaqtida restoranda taxminan 40 kishi bo‘lgan. Tezkor qutqaruv xizmatlari va o‘t o‘chirish guruhlari voqea joyiga yetib borib, kamida 40 nafar odamni qutqarishga muvaffaq bo‘lgan.
Voqea joyidan olingan tasvirlarda binoni kuchli alanga qamrab olgani, qalin tutun ko‘tarilgani va binoning tashqi qismlari jiddiy zarar ko‘rgani aks etgan. Ayrim guvohlarning aytishicha, odamlar yong‘indan qochishga urinib, binodan sakrashga majbur bo‘lgan.
Ayni paytda yong‘in sabablari va holat tafsilotlarini aniqlash bo‘yicha tergov ishlari olib borilmoqda.
Hindiston Bosh vaziri Narendra Modi halok bo‘lganlarning yaqinlariga hamdardlik bildirib, jarohatlanganlarga tezroq sog‘ayish tilagan.
