AQSHda 4,5 million dollarlik tovarlarni o‘g‘irlashda gumonlangan o‘zbekistonliklar ushlandi
Gumonlanuvchilar omborlardan sigaretalar, qimmatbaho pishloqlar, go'sht va mis mahsulotlarini olib chiqib ketishgan.
AQShning Nyu-York shahrida 4,5 million dollarlik tovarlarni o‘g‘irlash bilan bog‘liq yirik firibgarlik sxemasida ishtirok etganlikda gumon qilinayotgan bir guruh o‘zbekistonlik shaxslar qo‘lga olindi. Bu haqda New York Post nashri xabar berdi.
Tergov ma’lumotlariga ko‘ra, gumonlanuvchilar yuk tashish kompaniyalari tizimlariga noqonuniy kirib, soxta hujjatlar va buyurtmalar orqali omborlardan qimmatbaho mahsulotlarni olib chiqib ketgan. O‘g‘irlangan yuklar orasida sigaretalar, pishloq mahsulotlari, go‘sht va mis kabi tovarlar bo‘lgan.
Ma’lum qilinishicha, firibgarlik sxemasi Nyu-Jersi, Pensilvaniya va Virjiniya shtatlaridagi omborlarni qamrab olgan. Keyinchalik noqonuniy yo‘l bilan qo‘lga kiritilgan mahsulotlar Nyu-Yorkka olib kelinib, sotilgan.
Xabarlarga ko‘ra, guruh a’zolari dabdabali hayot kechirgan: Brayton-Bich va Koni-Aylendda qimmat kvartiralar ijaraga olib yashashgan, qimmat mashinalarda yurishgan va tungi klublarda katta miqdorda naqd pul ko‘rsatib yurishgan.
"Bu yigitlar oʻzlarini go‘yo barcha mafiya filmlarini tomosha qilib ilhomlangandek va Amerika orzusini Cosa Nostra uslubida yashash orqali amalga oshirishga qaror qilishgan” degan huquqni muhofaza qilish organlari xodimlaridan biri.
Sud materiallariga ko‘ra, jinoiy guruh yetakchisi sifatida ko‘rilayotgan shaxs 11-iyunga qadar hibsda qoldirilgan. Yana ikki gumonlanuvchi ayblovlarni rad etgan va sud nazorati ostida ozod qilingan.
Shuningdek, mazkur ish doirasida yana bir necha shaxs avvalroq qo‘lga olingan bo‘lib, tergov harakatlari davom ettirilmoqda.
Avvalroq, AQSHda noqonuniy poyga uyushtirgan o‘zbekistonliklar qo‘lga olingani haqida xabar berilgan edi.
