Dehlidagi yong‘in qurbonlari orasida o‘zbekistonliklar yo‘q — TIV
Mehmonxonada sodir bo‘lgan mazkur yong‘in natijasida 21 kishi halok bo‘lgan edi.
O‘zbekistonning Hindistondagi elchixonasi Dehli shahrining janubiy qismida joylashgan mehmonxonada yuz bergan yong‘in oqibatida halok bo‘lgan va jarohatlanganlar orasida O‘zbekiston fuqarolari yo‘qligini ma’lum qildi. Bu haqda Dunyo axborot agentligi xabar berdi.
3-iyun kuni sodir bo‘lgan mazkur yong‘in natijasida 21 kishi halok bo‘lgan edi. Mahalliy rasmiy manbalarga ko‘ra, qurbonlarning katta qismi Liberiya, Nigeriya, Mozambik va Bangladesh kabi davlatlar fuqarolari hisoblanadi.
Dastlabki ma’lumotlarga ko‘ra, yong‘in mehmonxonaning birinchi qavatida joylashgan restoran hududidan boshlangan bo'lishi mumkin. Binoda yong‘in xavfsizligi talablarining buzilishi, jumladan, cheklangan chiqish yo‘laklari va ortiqcha xona sig‘imi vaziyatni yanada og‘irlashtirgan.
Voqea joyidan 40 dan ortiq kishi evakuatsiya qilingan bo‘lib, ularning bir qismi turli darajada jarohat olgan.
O‘zbekiston elchixonasining Konsullik bo‘limi Hindistonning vakolatli organlari bilan hamkorlikda vaziyatni o‘rganib chiqqan va o‘zbekistonliklar orasida jabrlanganlar yo‘qligini tasdiqlagan.
