Shavkat Mirziyoyev Amin Tojiyev vafoti munosabati bilan hamdardlik bildirdi

Prezidenti Shavkat Mirziyoyev taniqli davlat va jamoat arbobi, mehnat faxriysi Amin Hamroyevich Tojiyevning vafoti munosabati bilan uning oila a’zolari va yaqinlariga chuqur hamdardlik bildirdi.

 

Amin Tojiyev 4-iyun kuni 79 yoshida vafot etgan. U o‘zining ko‘p yillik mehnat faoliyatini mamlakat qishloq xo‘jaligi hamda Orolbo‘yi hududini rivojlantirishga bag‘ishlagan.

 

Faoliyati davomida Qoraqalpog‘iston Respublikasi Vazirlar Kengashi raisi, qishloq xo‘jaligi vaziri, O‘rmon xo‘jaligi boshqarmasi boshlig‘i hamda O‘zbekiston davlat agrosanoat qo‘mitasi raisining birinchi o‘rinbosari kabi mas’ul lavozimlarda samarali mehnat qilgan.

 

Marhum 50 yildan ortiq faoliyati davomida Orolbo‘yi mintaqasining ijtimoiy-iqtisodiy rivojlanishi, infratuzilmani takomillashtirish va aholi farovonligini oshirishga munosib hissa qo‘shgan.

Jumladan, Tuyamo‘yin–Nukus–Taxtako‘pir sug‘orish tarmog‘i hamda qator muhim ijtimoiy obyektlarni barpo etishda faol ishtirok etgan.

 

Nafaqaga chiqqanidan keyin ham u Qoraqalpog‘istonning ijtimoiy hayotida faol qatnashib, ekologik muhitni yaxshilash, obodonlashtirish, ko‘kalamzorlashtirish va yoshlarni vatanparvarlik ruhida tarbiyalash yo‘nalishlarida samarali faoliyat olib borgan.

 

Amin Tojiyevning mamlakat taraqqiyotiga qo‘shgan xizmatlari yuksak baholanib, u “El-yurt hurmati”, “Do‘stlik”, “Mehnat shuhrati” ordenlari hamda Qoraqalpog‘iston Respublikasida xizmat ko‘rsatgan mexanizator faxriy unvoni bilan taqdirlangan.