Toshkent metrosida "svet" o‘chib qoldi: harakat to‘xtab qolgan
Elektr ta’minotidagi uzilishlarga Toshkent IESdagi transformator nosozligi sabab bo‘lgan.
Toshkent metropoliteni ma’lumotiga ko‘ra, 4-iyun kuni soat 12:41 atrofida O‘zbekiston, Chilonzor va Yunusobod yo‘nalishlarida shahar elektr tarmoqlaridagi avariya sabab qisqa muddatli elektr uzilishi yuz berdi. Bu holat poyezdlar harakati hamda bekatlardagi yoritish tizimlariga ta’sir ko‘rsatdi.
Metropoliten tomonidan bildirilishicha, vaziyat tezkorlik bilan nazoratga olingan. Harakat xavfsizligini ta’minlash uchun zaxira generatorlari ishga tushirilgan bo‘lib, bu tizim to‘liq tiklangunga qadar ish jarayonini barqaror ushlab turishga imkon bergan.
Hozirda poyezdlar harakati mas’ul xizmatlar nazorati ostida davom etmoqda. Yo‘lovchilarga yetkazilgan noqulayliklar uchun uzr so‘ralgan.
Energetika vazirligi avvalroq ma’lum qilishicha, uzilishlarga Toshkent IESdagi transformator nosozligi sabab bo‘lgan. Avariya soat 13:01 da bartaraf etilgan, 13:22 ga kelib esa barcha iste’molchilarda elektr ta’minoti to‘liq tiklangan.
