Saida Mirziyoyeva rekonstruksiya qilingan qo‘g‘irchoq teatriga bordi

 

Prezident Administratsiyasi rahbari Saida Mirziyoyeva va Ijtimoiy himoya milliy agentligi direktorining birinchi o‘rinbosari, O‘zbekiston Milliy Paralimpiya qo‘mitasi raisining birinchi o‘rinbosari, World Aquatics Byurosi a’zosi Shahnoza Mirziyoyeva Toshkent shahridagi O‘zbek Milliy qo‘g‘irchoq teatriga tashrif buyurib, Vilgelm Gauf ertagi asosida sahnalashtirilgan “Xalifa Laylak” spektaklini tomosha qildi.

 

                                         

 

Saida Mirziyoyeva o‘zining ijtimoiy tarmoqdagi sahifasida ushbu asar inson irodasi, o‘zlikni anglash va maqsad sari intilish g‘oyalarini o‘zida mujassam etgan qadrli hamda sevimli ertaklardan biri ekanini ta’kidlagan.

 

                                         

 

Qayd etilishicha, teatrda olib borilgan rekonstruksiya ishlarining birinchi bosqichi yakunlangach, maskan faoliyati yana jonlangan. Bugungi kunda bu yerda spektakllar namoyish etilib, bolalarning quvnoq ovozlari yangramoqda, ota-onalar esa farzandlari bilan mazmunli hordiq chiqarmoqda.

 

                                           

 

Rekonstruksiya jarayonida teatrning tarixiy qiyofasi va o‘ziga xos me’moriy ruhi asrab qolingan. Jumladan, “Ertaklar shaharchasi”, zalning cho‘yan eshiklari, karnay chalgan sozandalar siymolari, noyob shisha plafonlar, peshtoq kompozitsiyalari hamda mozaikalar qayta tiklangan.

 

                                         

 

Ta’kidlanishicha, mamlakatdagi madaniyat maskanlarini modernizatsiya qilish, ularning moddiy-texnik bazasini mustahkamlash va tarixiy merosini asrab-avaylash bo‘yicha ishlar izchil davom ettirilmoqda. Bu esa aholining, ayniqsa yosh avlodning madaniy hayotdagi ishtirokini yanada kengaytirishga xizmat qilmoqda.

 

                                       

 

Eslatib o‘tamiz, joriy yilning 30-aprel kuni Prezident Administratsiyasi rahbari Toshkent shahridagi bir qator teatrlar faoliyati va infratuzilmasi bilan tanishgan edi. Tashrif davomida poytaxtdagi uchta teatr binosi ko‘zdan kechirilib, ularning moddiy-texnik bazasini mustahkamlash, ta’mirtalab obyektlarni rekonstruksiya qilish hamda zamonaviy jihozlar bilan ta’minlash masalalari muhokama qilingan.