Eron terma jamoasiga AQSHga faqat o‘yin kunlari kirishga ruxsat beriladi
Futbolchilar o‘yin o‘tkazilgan kunning o‘zida mamlakatni tark etishi shart bo‘ladi.
Eron milliy futbol terma jamoasi futbolchilariga Jahon chempionati davomida AQSH hududiga faqat o‘yin o‘tkaziladigan kunlari kirishga ruxsat beriladi. Bu haqda Eronning Meksikadagi elchisi Abulfazl Pasandidex ma’lum qildi, deya xabar bermoqda aNews.
Elchining so‘zlariga ko‘ra, futbolchilar AQSHga ertalab kirishi mumkin, biroq o‘yin o‘tkazilgan kunning o‘zida mamlakatni tark etishi shart bo‘ladi.
Pasandidexning Tixuana shahrida jurnalistlarga ma’lum qilishicha, Eron futbol federatsiyasining 15 nafar vakili Jahon chempionati uchun zarur bo‘lgan AQSH vizalarini hali olmagan. Shu bilan birga, ular Eronning 15-iyun kuni Yangi Zelandiya terma jamoasiga qarshi ilk uchrashuvigacha viza olishiga umid qilinmoqda.
Eron OAVlari xabariga ko‘ra, viza olmaganlar orasida federatsiya prezidenti Mehdi Toj hamda jamoaning logistika bo‘yicha menejeri ham bor.
Qayd etilishicha, Eron terma jamoasining barcha futbolchilari Meksikaga kirish uchun viza olgan. 11-iyundan 19-iyulgacha AQSH, Kanada va Meksikada bo‘lib o‘tadigan Jahon chempionatida Eronning guruh bosqichidagi barcha o‘yinlari AQSH hududida o‘tkaziladi.
Fevral oyida Eron va AQSH o‘rtasida urush boshlanganidan so‘ng, Eron terma jamoasining turnir uchun AQSHga kirishi masalasi yuzasidan xavotirlar paydo bo‘lgan edi.
Shu sababli Eron futbol federatsiyasi may oyida jamoaning o‘quv-mashg‘ulot yig‘inini AQSHning Arizona shtatidan Meksikaning Tixuana shahriga ko‘chirishga qaror qilgan.
Eron terma jamoasi 15-iyun kuni Los-Anjelesda Yangi Zelandiya, 21-iyun kuni esa Belgiya terma jamoasiga qarshi maydonga tushadi. Jamoaning guruh bosqichidagi so‘nggi uchrashuvi 26-iyun kuni Sietl shahrida Misr terma jamoasiga qarshi bo‘lib o‘tadi.
