O‘zbekistonda qurilish kompaniyalari ustidan shikoyatlar keskin oshdi
2025-yil davomida qurilish sohasidagi qonunbuzilishlar yuzasidan 1 706 ta murojaat kelib tushgan bo‘lsa, 2026-yilning birinchi choragidayoq bunday murojaatlar soni qariyb mingtagacha yetgan.
O‘zbekistonda qurilish sohasi bilan bog‘liq murojaatlar soni sezilarli darajada ko‘paydi. Bu haqda Raqobat qo‘mitasi ma’lum qildi.
Qo‘mita ma’lumotlariga ko‘ra, 2025-yil davomida qurilish sohasidagi qonunbuzilishlar yuzasidan 1 706 ta murojaat kelib tushgan bo‘lsa, 2026-yilning birinchi choragidayoq bunday murojaatlar soni qariyb mingtagacha yetgan.
Murojaatlarda asosan qurilish ishlarining sifatsiz bajarilishi, ko‘rsatilmagan xizmatlar uchun haq undirilishi, shartnoma majburiyatlariga rioya qilinmasligi, uy-joylarning belgilangan muddatda topshirilmasligi hamda zarur ruxsatnomalarsiz oldindan to‘lov yig‘ilishi bilan bog‘liq holatlar qayd etilgan.
Shuningdek, fuqarolar tomonidan texnik talablarga javob bermaydigan qurilish materiallaridan foydalanilishi, reklamalarda va’da qilingan loyihalarning amalda bajarilmagani yuzasidan ham ko‘plab e’tirozlar bildirilgan.
Shu munosabat bilan Raqobat qo‘mitasi fuqarolarni hali qurilishi yakunlanmagan uy-joylarga mablag‘ kiritish yoki yangi qurilgan ko‘p qavatli uylardan xonadon xarid qilishdan avval barcha hujjatlar va shartnoma bandlarini sinchkovlik bilan o‘rganishga chaqirdi.
Xususan, quruvchi va xaridorning huquq hamda majburiyatlari, obyektni topshirish muddatlari, shuningdek, ushbu muddatlar buzilganda tomonlarning javobgarligi alohida e’tibor talab qilishi ta’kidlangan.
Qo‘mita qurilish tashkilotlarini amaldagi qonunchilik talablariga qat’iy rioya qilishga chaqirib, qonunbuzilish holatlari aniqlangan taqdirda tegishli ta’sir choralari qo‘llanilishini eslatgan.
Eslatib o'tamiz, avvalroq Prezident farmoniga muvofiq, 2026-yil oktabr oyidan boshlab qurilish jarayonida korrupsiyaviy holatlarni barvaqt aniqlash maqsadida “sirli mijoz” mexanizmi joriy etilishi xabar qilingan edi. Shuningdek, 2026-yil sentyabrdan yer uchastkalariga oid huquqlar yuzaga kelgan paytdan boshlab qurilish ishlarining qonunchilik talablariga muvofiqligi bo‘yicha ogohlantirish tizimi ham ishga tushiriladi.
