Қурилиш соҳасида “сирли мижоз” усули жорий этилади

Ўзбекистонда қурилиш соҳасида коррупция ҳолатларининг олдини олиш ва профилактикани кучайтириш мақсадида “сирли мижоз” механизми жорий этилади. Бу ҳақда президентнинг 5 июндан кучга кирган 104-сонли фармонида белгиланди.

 

Ҳужжатга кўра, 2026 йил октябрь ойидан бошлаб Қурилиш ва уй-жой коммунал хўжалиги соҳасида назорат қилиш инспекциясининг комплаенс назорат хизмати фаолиятида қурилиш жараёни иштирокчиларининг коррупсиявий хатти-ҳаракатларини эрта аниқлашга қаратилган “сирли мижоз” тадбирлари йўлга қўйилади. Ушбу тадбирлар ҳар чоракда камида бир марта ўтказилиши белгиланган.

 

Шунингдек, фармонда ноқонуний қурилишларнинг олдини олиш бўйича ҳам янги тартиблар назарда тутилган. Хусусан, 2026 йил сентябрдан бошлаб ерга оид ҳуқуқ вужудга келган вақтдан қурилишни бошлашгача бўлган жараёнда қонунчилик талабларига риоя этилиши бўйича огоҳлантириш (эслатма) тизими жорий этилади.

 

Бунда ерга эгалик ҳуқуқини берувчи ҳужжатлар — аукцион, олди-сотди шартномаси ва кадастр ҳужжатлари расмийлаштирилиши жараёнида мулкдорларга OneID тизими орқали қурилишни бошлаш тартиби ҳақида электрон огоҳлантириш юборилиши кўзда тутилган.

 

2026 йил ноябрдан эса Ўзбекистон маҳаллалари уюшмасининг “онлине-маҳалла.уз” тизими Қурилиш ва уй-жой коммунал хўжалиги вазирлигининг “Шаффоф қурилиш” миллий ахборот тизими билан интеграция қилинади. Натижада маҳаллаларда ҳоким ёрдамчилари ҳудуддаги янги қурилишлар ҳақида ваколатли органларни хабардор қилиб боради.

 

Шунингдек, 2026 йил декабрга қадар ўзбошимчалик билан қурилган объектларни ташқи муҳандислик тармоқларидан (электр, сув, йўл) узиб қўйиш тартибини жорий этиш бўйича норматив-ҳуқуқий ҳужжат лойиҳаси ишлаб чиқилиб, Вазирлар Маҳкамасига киритилади.

 

Маълумот учун, 2025 йилда “сирли мижоз” усулидаги назорат тизими мамлакатда тиббиёт, дорихона хизматлари фаолиятида ҳам жорий этилган.