Italiyada Isroil vaziriga nisbatan tergov boshlandi

 

Italiya prokuraturasi Isroilning milliy xavfsizlik vaziri Itamar Ben-Gvirga nisbatan tergov boshladi. Surishtiruv G‘azoga gumanitar yordam olib borayotgan “Sumud” flotiliyasi faollarining qo‘lga olinishi va ularga nisbatan muomala bilan bog‘liq holatlar yuzasidan olib borilmoqda. Bu haqda Italiyaning Ansa agentligi xabar berdi.

 

Ma’lumotlarga ko‘ra, Rim prokuraturasi tomonidan olib borilayotgan tergov Isroilning Ashdod Port portida saqlangan faollar bilan bog‘liq voqealarni qamrab oladi. Xususan, qo‘lga olinganlarning qo‘llari orqadan bog‘langan holda saqlangani haqidagi ma’lumotlar o‘rganilmoqda.

 

Tergov doirasida Isroil kuch tuzilmalarining kemalarni to‘xtatish, ko‘zdan kechirish va faollarni hibsga olish jarayonidagi harakatlari ham tekshirilmoqda. Ushlanganlar orasida Italiya fuqarolari ham bo‘lgani aytilmoqda.

 

Mahalliy OAV ma’lumotlariga ko‘ra, tergovchilar ehtimoliy qiynoqlar, noqonuniy hibs va odam o‘g‘irlash bilan bog‘liq ayblovlarni ham ko‘rib chiqmoqda. Faollar manfaatlarini himoya qilayotgan advokatlar ayrim hibsga olinganlar qiynoqqa solingani va jinsiy zo‘ravonlikka duch kelganini da’vo qilgan.

 

Eslatib o‘tamiz, may oyida G‘azo sektoriga insonparvarlik yordami yetkazish maqsadida yo‘lga chiqqan “Sumud” flotiliyasi xalqaro suvlarda Isroil harbiy-dengiz kuchlari tomonidan to‘xtatilgan edi. Isroil Tashqi ishlar vazirligi o‘shanda 430 nafar faol qo‘lga olinganini ma’lum qilgan.

 

Shuningdek, Italiya prokuraturasi avvalroq xalqaro suvlarda Italiya fuqarolarining qo‘lga olinishi holati yuzasidan ham alohida tergov boshlagan edi. Hodisa bo‘yicha uchta rasmiy shikoyat kelib tushgani bildirilgan.