Eron uran zaxiralariga kirish yo‘llarini portlatib, minalar o‘rnatmoqda

Eron AQSH tomonidan boyitilgan uran zaxiralarini qo‘lga kiritish ehtimolidan xavotirlanib, yadroviy materiallar saqlanayotgan obyektlarda xavfsizlik choralarini kuchaytirdi. Bu haqda AQSH razvedkasiga yaqin manbalarga tayanib, CNN xabar berdi.

 

Ma’lumotlarga ko‘ra, Tehron qurol darajasiga yaqin boyitilgan uran saqlanayotgan ayrim tunnellarni ataylab qulatgan va kirish yo‘llariga portlovchi minalar o‘rnatgan. Natijada taxminan yarim tonna yuqori darajada boyitilgan uranga yetib borish ancha murakkab va xavfli vazifaga aylangan.

 

CNN manbalarining ta’kidlashicha, bu choralar AQSH prezidenti Donald Trampning uran zaxiralarini nazoratga olish yoki qo‘lga kiritish imkoniyatini ochiq muhokama qilganidan so‘ng ko‘rilgan bo‘lishi mumkin.

 

Biroq ekspertlar bu qaror Eronning o‘zi uchun ham muammolar tug‘dirishi mumkinligini aytmoqda. AQSH Milliy yadro xavfsizligi ma’muriyatining sobiq rasmiysi Skott Rokkerning fikricha, tunnellarni qulatish va hududlarni minalashtirish boyitilgan uranni keyinchalik tekshirish, olib chiqish yoki qayta ishlash jarayonini sezilarli darajada murakkablashtiradi.

 

Uning aytishicha, agar Tehron xalqaro kelishuv doirasida uran zaxiralarini nazorat uchun taqdim etishga rozi bo‘lsa, ushbu materiallarga kirish va ularning to‘liq hisobini ta’minlash mas’uliyati Eron zimmasiga tushadi. Shu bilan birga, Tehron uranning ayrim qismlarini qazib olishning imkoni bo‘lmaganini da’vo qilishi ham mumkin.

 

Ekspertlar nazarida, bunday holat xalqaro hamjamiyatda Eron kelajakda ushbu materiallarga qayta kirish imkoniyatini saqlab qolmaganiga oid shubhalarni kuchaytirishi mumkin.

 

CNN ma’lumotiga ko‘ra, boyitilgan uran zaxiralarining katta qismi Isfahon yadro majmuasidagi yerosti inshootlarida saqlanmoqda. AQSH va Eron o‘rtasida ehtimoliy yadroviy kelishuv muhokama qilinayotgan bo‘lsa-da, uranni nazorat qilish va olib chiqish bilan bog‘liq texnik masalalar bo‘yicha qo‘shimcha muzokaralar talab etilishi kutilmoqda.