Rastrata qilgan mansabdorlar 10 yilgacha qamalishi mumkin
Mansab mavqeidan foydalanib sodir etilgan o‘zlashtirish va rastrata qilish jinoyatlari uchun javobgarlik kuchaytirilmoqda.
Qonunchilikka kiritilayotgan navbatdagi muhim o‘zgartirishlar o‘zlashtirish va rastrata qilish yo‘li bilan talon-toroj qilish jinoyatlari uchun javobgarlik choralarini kuchaytirishni nazarda tutadi.
Yangi tartibga ko‘ra, Jinoyat kodeksining 167 va 168-moddalarida nazarda tutilgan ayrim qilmishlarning kvalifikatsiya belgilari qayta ko‘rib chiqilib, ularning bir qismi og‘irroq jinoyatlar toifasiga o‘tkazilmoqda.
Xususan, mansab mavqeini suiiste’mol qilish yoki xizmat mavqeidan foydalanib sodir etilgan o‘zlashtirish va rastrata qilish holatlari mazkur moddalarning og‘irroq qismlariga o‘tkazilishi belgilangan. Natijada bunday jinoyatlar uchun 10 yilgacha ozodlikdan mahrum qilish jazosi qo‘llanilishi mumkin.
Jumladan, Jinoyat kodeksining 167-moddasi ikkinchi qismi “g” bandida nazarda tutilgan mansab mavqeini suiiste’mol qilish yo‘li bilan sodir etilgan o‘zlashtirish yoki rastrata qilish jinoyati ushbu moddaning uchinchi qismi “d” bandiga ko‘chirilmoqda.
Eslatib o'tamiz, avvalroq narkolaboratoriya tashkil etganlar 10 yilgacha qamalishi haqida xabar berilgan edi.
