Narkolaboratoriya tashkil etganlar 10 yilgacha qamaladi
Giyohvand moddalar noqonuniy aylanmasiga homiylik qilganlar 8 yilgacha qamalishi mumkin.
O‘zbekistonda giyohvandlik vositalari va psixotrop moddalar bilan bog‘liq jinoyatlar uchun javobgarlik kuchaytirildi. Ayrim qonun hujjatlariga o‘zgartirish va qo‘shimchalar kiritishni nazarda tutuvchi qonun qabul qilindi. Bu haqda Adliya vazirligi xabar berdi.
Unga ko‘ra, giyohvandlik vositalari, psixotrop moddalar yoki ularning analoglarini ishlab chiqarish, tayyorlash yoki qayta ishlash maqsadida noqonuniy narkolaboratoriya tashkil etgan shaxslar 5 yildan 10 yilgacha ozodlikdan mahrum qilinishi mumkin.
Shuningdek, giyohvandlik vositalari, psixotrop moddalar, ularning analoglari yoki kuchli ta’sir qiluvchi moddalarni iste’mol qilish va tarqatish uchun bangixona tashkil etish yoki saqlash 3 yildan 5 yilgacha ozodlikdan mahrum qilish bilan jazolanadi.
Qonunga ko‘ra, giyohvandlik vositalari, psixotrop moddalar yoki ularning analoglari, shuningdek kuchli ta’sir qiluvchi moddalarning noqonuniy muomalasiga homiylik qilish uchun ham jinoiy javobgarlik belgilangan. Bunday qilmish uchun 5 yildan 8 yilgacha ozodlikdan mahrum qilish jazosi qo‘llanadi.
Bundan tashqari, kuchli ta’sir qiluvchi yoki zaharli moddalarni o‘g‘rilik yoxud firibgarlik yo‘li bilan qonunga xilof ravishda egallaganlik uchun 3 yilgacha axloq tuzatish ishlari, 2 yildan 5 yilgacha ozodlikni cheklash yoki 5 yilgacha ozodlikdan mahrum qilish jazosi nazarda tutilgan.
