Rossiyada aviatsiya yonilg‘isi taqchilligi yuzaga keldi

Rossiyada benzin taqchilligi ortidan aviatsiya yoqilg‘isi bozorida ham muammolar kuzatilmoqda. Bir qator yirik aeroportlar samolyotlarga aviakerosin quyish bo‘yicha cheklovlar joriy etdi. Bu haqda The Moscow Times yozmoqda.

 

“Aviasionnaya antresol” Telegram-kanali ma’lumotiga ko‘ra, Maxachqala, Mineralniye Vodi, Krasnodar, Astraxan va Nijniy Novgorod aeroportlari uchuvchilar uchun e’lon qilgan NOTAN xabarnomalarida yonilg‘i limiti belgilanganini ma’lum qilgan. Endilikda samolyotlar faqat parvozni amalga oshirish uchun zarur bo‘lgan hajmdagi aviakerosin bilan ta’minlanmoqda.

 

Xususan, Maxachqala aeroportida Dubay yo‘nalishi uchun 8 tonna, Minsk uchun 3,5 tonna, Toshkent reysi uchun esa 4 tonna yonilg‘i limiti o‘rnatilgan. Charter reyslarni yonilg‘i bilan ta’minlash esa alohida kelishuv asosida amalga oshirilmoqda.

 

Mutaxassislar muammoni may oyida Rossiyadagi neftni qayta ishlash zavodlariga uyushtirilgan keng ko‘lamli hujumlar bilan bog‘lamoqda. Ma’lumotlarga ko‘ra, bir oy davomida 16 ta zavod zarbaga uchragan, natijada mamlakatning markaziy hududlarida neftni qayta ishlash hajmi keskin qisqargan.

 

“Kommersant” nashri manbalarining bildirishicha, may oyi oxirida bir qator aviakompaniyalar Sankt-Peterburg, Yekaterinburg, Ufa va boshqa aeroportlarda amaldagi shartnomalar bo‘yicha samolyotlarni yoqilg‘i bilan ta’minlash imkoni yo‘qligi haqida ogohlantirilgan.

 

Sankt-Peterburg tovar-xomashyo birjasi ma’lumotlariga ko‘ra, 4-maydan buyon aviakerosin savdosi deyarli to‘xtab qolgan. Shu bilan birga, ulgurji bozorda yoqilg‘i narxi bir tonna uchun rekord darajadagi 113 ming rublgacha ko‘tarilib, mart oyining boshiga nisbatan 52 foizga qimmatlashgan.

 

Vaziyat fonida Rossiya hukumati 1-iyundan 30-noyabrgacha aviakerosin eksportini taqiqladi. Rasmiylar bu chorani ichki bozordagi barqarorlikni saqlash zarurati bilan izohladi.

 

Tahlilchilarning fikricha, eksportga qo‘yilgan taqiq aviatsiya yoqilg‘isining ichki bozordan chiqib ketishining oldini olib, ehtimoliy taqchillikni yumshatishga xizmat qiladi. Biroq mamlakatdagi aviakerosin ishlab chiqarish hajmini aniq baholash qiyin, chunki Rossiya 2024-yildan boshlab neft mahsulotlari ishlab chiqarish bo‘yicha statistik ma’lumotlarni maxfiylashtirgan. 

 

Avvalgi ochiq ma’lumotlarga ko‘ra, Rossiyada yiliga qariyb 11 million tonna aviakerosin ishlab chiqarilgan.