Tinchlik hech qachon hozirgidek yaqin bo‘lmagan — Shahboz Sharif
Pokiston Bosh vaziri AQSh va Eron o‘rtasidagi kelishuv matni bo‘yicha kelishuvga erishilganini ma'lum qildi.
Pokiston Bosh vaziri Shahboz Sharif AQSh va Eron o‘rtasidagi tinchlik kelishuvi loyihasining yakuniy matni bo‘yicha kelishuvga erishilganini ma’lum qildi. Uning ta’kidlashicha, muzokaralarda Pokiston va Qatar vositachi davlatlar sifatida ishtirok etmoqda.
Bosh vazir ijtimoiy tarmoqdagi sahifasida “Tinchlik hech qachon hozirgidek yaqin bo‘lmagan” deya bayonot bergan. Eron tashqi ishlar vaziri Abbos Aroqchi ham o‘z navbatida tomonlar o‘rtasidagi o‘zaro anglashuv memorandumi yakunlanishiga misli ko‘rilmagan darajada yaqin qolinganini qayd etgan.
Kelishuvga oid xabarlar xalqaro neft bozorlarida ham sezilarli ta’sir ko‘rsatgan. AQSh prezidenti Donald Tramp barcha tomonlar yakuniy shartlarni ma’qullaganini bildirganidan so‘ng Brent markali neft narxi keskin pasayib, urush boshlanganidan buyon eng past ko‘rsatkichlardan birini qayd etgan. Keyinchalik ayrim bayonotlar ortidan narxlar qisman tiklangan bo‘lsa-da, bozor yuqori o‘zgaruvchanlikni saqlab qolmoqda.
Dastlabki ma’lumotlarga ko‘ra, memorandum loyihasida sulh muddatini yana 60 kunga uzaytirish, Hormuz bo'g'ozi orqali qatnovni bosqichma-bosqich tiklash hamda Eron yadroviy dasturi bo‘yicha muzokaralarning keyingi bosqichlarini belgilash nazarda tutilgan.
Ayni paytda memorandumning rasmiy matni e’lon qilinmagan. AQSh va Eron tomonlari hujjat yuzasidan yakuniy tasdiq jarayonlari davom etayotganini bildirgan.
