Toshkentdagi ko‘chalardan biriga Mustafo Kamol Otaturk nomi beriladi
Yangi nom beriladigan ko‘cha “O‘zbek–Turk do‘stligi” xiyoboni yaqinida joylashgan.
Toshkent shahrida joylashgan ko‘chalardan biriga Turkiya Respublikasining asoschisi Mustafo Kamol Otaturk nomi beriladi.
Bu haqdagi qaror 15-iyun kuni Prezident tomonidan imzolandi.
Unga ko‘ra, Yashnobod tumanida barpo etilayotgan “O‘zbek-turk do‘stligi” xiyoboniga tutash bo‘lgan Abdulla Qodiriy ko‘chasining ma’lum bir qismi (Istiqlol, Farg‘ona yo‘li va Nukus ko‘chalari kesishmasidan Abdulla Qodiriy ko‘chasi va Maxtumquli shohko‘chasi kesishmasigacha) Mustafo Kamol Otaturk nomi bilan ataladi.
Mazkur qaror O‘zbekiston va Turkiya o‘rtasidagi do‘stlik va hamkorlik munosabatlarini yanada mustahkamlash, tarixiy shaxslar xotirasini e’zozlash va xalqaro aloqalarni rivojlantirishga xizmat qilishi ta’kidlanmoqda.
Eslatib o'tamiz, avvalroq Turkiyaning Hatay viloyatining Arsuz tumanida O‘zbekiston tomonidan bunyod etilgan turar-joy majmuasi negizida tashkil etilgan “O‘zbekiston mahallasi”, Shavkat Mirziyoyev bulvari hamda Toshkent va Samarqand ko‘chalarining tantanali ochilish marosimi bo‘lib o‘tgani xabar qilingan edi.
