Eronlik xonanda hijobsiz chiqish qilgani uchun 74 darra urildi
Musiqachilar “jamoat axloqini haqorat qiluvchi qo‘pol va axloqsiz kontent tayyorlash hamda tarqatish”da aybdor deb topilgan.
Eron sudlari xonanda Parastu Ahmadi va uning ijodiy jamoasi a’zolariga nisbatan hukm chiqardi. The Guardian nashri xabariga ko‘ra, san’atkor 2024-yil dekabr oyida internet orqali namoyish etilgan konsertda hijobsiz sahnaga chiqqani uchun 74 darra bilan jazolanishga hukm qilingan.
Shuningdek, xonandaning ijodiy jamoasidagi sakkiz nafar a’zoga ham xuddi shunday jazo tayinlangan. Bundan tashqari, ularga ikki yil davomida mamlakatdan chiqish hamda ijodiy faoliyat bilan shug‘ullanish taqiqlangan.
Qum viloyati Jinoyat ishlari bo‘yicha sudi musiqachilarni “jamoat axloqini haqorat qiluvchi qo‘pol va axloqsiz kontent tayyorlash hamda tarqatish”da aybdor deb topgan.
Ma’lumotlarga ko‘ra, 2024-yil 11-dekabr kuni 29 yoshli Parastu Ahmadi YouTube platformasida “Az Khoone Javanane Vatan” nomli vatanparvarlik qo‘shig‘ini jonli ijro etgan. Xonanda yelkalari ochiq qora libosda, hijobsiz holda sahnaga chiqqan. Eron qonunchiligiga muvofiq, ayollarning jamoat joylarida yakkaxon chiqish qilishi va hijobsiz sahnaga chiqishi taqiqlangan.
Translyatsiya ilk 24 soat ichida qariyb 500 ming marta tomosha qilingan bo‘lsa, bir necha kun ichida ko‘rishlar soni 2 millionga yaqinlashgan. Ko‘p o‘tmay xonanda va bir necha musiqachilar qisqa muddatga hibsga olinib, keyinchalik qo‘yib yuborilgan. Shundan so‘ng ularga nisbatan jinoiy ish qo‘zg‘atilgan.
