Isroilning Livandagi harakatlari AQSH-Eron kelishuviga zarba berishi mumkin — WP

 

AQSH razvedka idoralari Isroil bosh vaziri Benyamin Netanyaxuning harakatlari prezident Donald Tramp ma’muriyati va Eron o‘rtasida erishilgan uzoq muddatli tinchlik kelishuvi istiqbollariga salbiy ta’sir ko‘rsatishi mumkinligi haqida Oq uyni ogohlantirdi. Bu haqda The Washington Post amerikalik rasmiylarga tayanib xabar berdi.

 

Nashr ma’lumotlariga ko‘ra, mazkur ogohlantirish Isroil hukumati va Tramp ma’muriyati o‘rtasida ayrim masalalar yuzasidan kelishmovchiliklar kuchayib borayotgan bir paytda yangragan.

 

Razvedka hisobotlarida Isroilning Livandagi harbiy amaliyotlarni davom ettirish niyatida ekani qayd etilgan. Bu esa AQSH va Eron o‘rtasida erishilgan kelishuvning muhim bandlaridan biri bo‘lgan mintaqadagi keskinlikni kamaytirish bo‘yicha majburiyatlarga zid kelishi mumkin.

 

Manbalarga ko‘ra, kuzda Isroilda bo‘lib o‘tadigan parlament saylovlari arafasida Benyamin Netanyaxuning siyosiy pozitsiyasi ichki auditoriyaga Livandan qo‘shinlarni olib chiqmasligi va “Hizbulloh”ga nisbatan qat’iy siyosat yuritishini namoyish eta olishiga ham bog‘liq.

 

Hisobotda AQSH va Eron o‘rtasidagi kelishuv shartlari Isroilda norozilik uyg‘otayotgani ham ta’kidlangan. Ayrim isroillik siyosatchilar va rasmiylar mazkur kelishuv Tehronga nisbatan “maksimal bosim” siyosatini zaiflashtirishi hamda Isroilning xavfsizlik manfaatlariga salbiy ta’sir ko‘rsatishi mumkinligini bildirgan.

 

Shuningdek, tahlilchilarga ko‘ra, Isroil Livandagi harbiy operatsiyalarni to‘xtatgan taqdirda ham Janubiy Livandan qo‘shinlarini olib chiqishdan bosh tortsa, bu AQSH va Eron o‘rtasida erishilgan kelishuvning barqarorligiga xavf tug‘dirishi mumkin.

 

AQSHning yuqori martabali amaldorlaridan biri esa Isroil va “Hizbulloh” o‘rtasidagi o‘t ochishni to‘xtatish bo‘yicha sulh Turkiya vaqti bilan soat 16:00 da kuchga kirganini ma’lum qilgan.