Nyu-Yorkdagi 174 yillik tarixiy cherkov butunlay yonib ketdi
Bruklindagi tarixiy cherkov ikki soat ichida kulga aylandi.
AQShning Nyu-York shahri Bruklin tumanidagi Janubiy Bushvik islohot cherkovida yuz bergan yirik yong‘in oqibatida 174 yillik tarixiy bino deyarli butunlay vayron bo‘ldi.
ABC telekanali ma’lumotlariga ko‘ra, yong‘in mahalliy vaqt bilan soat 13:20 atrofida Bushvik avenyusidagi cherkov binosida boshlangan. Oradan taxminan 20 daqiqa o‘tib, binoning qo‘ng‘iroq minorasi qulab tushgan.
Nyu-York yong‘in xavfsizligi xizmati bir necha soat davomida yong‘inni o‘chirish ishlarini olib borgan va soat 15:35 ga kelib alanga deyarli to‘liq bartaraf etilgan. Hodisa vaqtida bir nafar o‘t o‘chiruvchi yengil jarohat olib, unga voqea joyida tibbiy yordam ko‘rsatilgan.
Mutaxassislarning dastlabki baholariga ko‘ra, yong‘in cherkov binosiga jiddiy zarar yetkazgan va inshootni buzib tashlash masalasi ko‘rib chiqilmoqda. Yong‘inning kelib chiqish sabablari hozircha noma’lum bo‘lib, hodisa yuzasidan tergov harakatlari davom etmoqda.
Ta’kidlanishicha, Janubiy Bushvik islohot cherkovi 1982-yilda AQShning Tarixiy joylar milliy reyestriga kiritilgan. Mahalliy aholi va tarixshunoslar ushbu yodgorlikning yo‘qolishini hududning madaniy va tarixiy merosi uchun katta yo‘qotish sifatida baholamoqda.
