Bo‘stonliqda kanalga tushib ketgan ikkinchi bolaning jasadi topildi
17-iyun kuni ikki nafar voyaga yetmagan bola Bo‘zsuv kanaliga ehtiyotsizlik oqibatida tushib ketgan edi.
Toshkent viloyati Favqulodda vaziyatlar bosh boshqarmasi xabariga ko‘ra, g‘avvos-qutqaruvchilar tomonidan olib borilgan qidiruv ishlari davomida bugun soat 16:50 da ikkinchi bolaning jasadi suvdan topilgan.
Eslatib o‘tamiz, 17-iyun kuni “Obod” mahalla fuqarolar yig‘ini hududida yashovchi 2016 va 2018-yillarda tug‘ilgan ikki nafar voyaga yetmagan bola yashash uyi yaqinidan oqib o‘tuvchi Bo‘zsuv kanaliga ehtiyotsizlik oqibatida tushib ketgan.
Hodisa yuzasidan favqulodda xizmatlar tomonidan qidiruv-qutqaruv ishlari darhol boshlangan.
Avvalroq, 21-iyun kuni g‘avvos-qutqaruvchilar tomonidan o‘tkazilgan qidiruv ishlari davomida bir nafar bolaning jasadi suvdan topilgani ma’lum qilingan edi.
