Shavkat Mirziyoyev Qatar Amiriga portlash qurbonlari munosabati bilan ta’ziya yo‘lladi
Qatarda gaz majmuasidagi portlash oqibatida kamida 13 kishi halok bo‘lgan.
O‘zbekiston Prezidenti Shavkat Mirziyoyev Qatar Davlati Amiri Tamim bin Hamad Ol Soniyga Ras-Laffan sanoat zonasidagi gazni qayta ishlash majmuasida sodir bo‘lgan kuchli portlash va yong‘in oqibatida ko‘plab insonlar halok bo‘lgani hamda jiddiy jarohat olgani munosabati bilan ta’ziya yo‘lladi.
Ta’ziya maktubida davlat rahbari halok bo‘lganlarning oila a’zolari va yaqinlariga chuqur hamdardlik bildirib, jabrlanganlarning tez fursatda sog‘ayib ketishini tilagan.
Qatarning Ras-Laffan sanoat hududidagi gaz eksporti majmuasida yuz bergan portlash va yong‘in oqibatida kamida 13 kishi halok bo‘ldi, yana 66 kishi jarohatlandi.
Ma’lum qilinishicha, hodisa ishchilar Eron hujumlari sabab to‘xtatilgan obyekt faoliyatini qayta tiklashga urinayotgan paytda sodir bo‘lgan. QatarEnergy kompaniyasiga ko‘ra, portlash Barzan gaz ta’minoti majmuasida yuz bergan.
Qatar energetika vaziri Saad Sherida al-Kaabiyning aytishicha, hodisa sabotaj yoki boshqa dushmanona harakatlar bilan bog‘liq emas. Halok bo‘lganlar Hindiston va Pokiston fuqarolari bo‘lsa, jarohatlanganlar orasida Qatar hamda Afrika va Osiyoning turli davlatlari fuqarolari bor.
Qayd etilishicha, Qatar dunyodagi yirik tabiiy gaz ishlab chiqaruvchilardan biri hisoblanadi. Shu bois Ras-Laffandagi portlash global energiya bozorlariga ham ta’sir ko‘rsatishi mumkinligi qayd etilmoqda.
Mart oyida Eron raketasi Ras-Laffan hududiga kelib tushib, yong‘in kelib chiqqan va obyektga katta zarar yetgan edi. Shundan so‘ng Qatar mazkur hududdagi ishlab chiqarishni to‘xtatgan.
