Muzrabot tumani hokimiga hayfsan berildi

Surxondaryo viloyati Muzrabot tumani hokimi Abdulla Mamatqulovga nisbatan hayfsan intizomiy jazosi qo‘llanildi. Bu haqda Korrupsiyaga qarshi kurashish agentligi matbuot xizmati ma’lum qildi.

 

Avvalroq ijtimoiy tarmoqlarda tuman hokimining g‘alla topshirish rejasini bajarmayotgan fermerlar bilan o‘tkazilgan yig‘ilishdagi murojaati aks etgan videolavhalar keng muhokamalarga sabab bo‘lgan edi. Unda hokim tomonidan fermerlarga nisbatan haqoratli va tahqirlovchi munosabat bildirilgani jamoatchilik e’tiborini tortgandi.

 

Holat yuzasidan o‘tkazilgan o‘rganishlar davomida davlat xizmatchisining odob-axloq qoidalari talablariga zid xatti-harakatlarga yo‘l qo‘yilgani aniqlangan.

 

Amaldagi qonunchilikka ko‘ra, davlat fuqarolik xizmatchilari xizmat vazifalarini vijdonan bajarishi, davlat organlari va tashkilotlarining obro‘-e’tiboriga putur yetkazishi mumkin bo‘lgan xatti-harakatlardan tiyilishi, shuningdek, fuqarolar bilan munosabatlarda xushmuomalalik, hurmat va professionallik tamoyillariga qat’iy amal qilishi lozim.

 

Korrupsiyaga qarshi kurashish agentligi o‘z vakolatlari doirasida mazkur holat yuzasidan Surxondaryo viloyati hokimligiga xizmat tekshiruvi o‘tkazish hamda qonunchilikda belgilangan tartibda huquqiy baho berish bo‘yicha taqdimnoma kiritgan.

 

Taqdimnoma natijalari asosida Muzrabot tumani hokimi Abdulla Mamatqulovga nisbatan hayfsan intizomiy jazosi qo‘llanildi.

 

Agentlik ma’lumotiga ko‘ra, davlat xizmatchilari tomonidan odob-axloq qoidalariga rioya etilishini ta’minlash, davlat xizmatida yuksak kasbiy va axloqiy standartlarni qaror toptirish hamda qonun buzilishi holatlariga nisbatan javobgarlikning muqarrarligini ta’minlash borasidagi ishlar izchil davom ettiriladi.

 

Eslatib o‘tamiz, avvalroq Qarshi shahri hokimining birinchi o‘rinbosari Nurbek Turdiyevning xodimlarni dam olish kunlari majburiy mehnatga jalb qilgani va ularga nisbatan haqoratli munosabatda bo‘lgani yuzasidan ham tegishli o‘rganishlar boshlangan edi.