Қарши ҳокими ўринбосари xодимларни мажбурий меҳнатга жалб қилгани учун 41 млн сўм жаримага тортилди
Текширув натижасида Нурбек Турдиев томонидан ходимлар мажбурий меҳнатга жалб қилингани тасдиқланди.
Қашқадарё вилоятининг Қарши шаҳри ҳокимининг биринчи ўринбосари ходимларни дам олиш кунлари ишга жалб қилгани учун маъмурий жавобгарликка тортилди. Бу ҳақда Давлат меҳнат инспекцияси маълум қилди.
Қайд этилишича, ҳоким ўринбосарининг ходимларни дам олиш кунлари ишга мажбуран жалб қилгани ҳамда уларга нисбатан ҳақоратли муносабатда бўлгани ҳақидаги мурожаат белгиланган тартибда ўрганилган.
Текширув якунларига кўра, мажбурий меҳнатга йўл қўйилгани ўз тасдиғини топган. Шу муносабат билан мансабдор шахсга нисбатан Ўзбекистон Республикаси Маъмурий жавобгарлик тўғрисидаги кодексининг 51-моддаси асосида маъмурий жарима қўлланилган. Унга базавий ҳисоблаш миқдорининг 100 баравари (41 миллион 200 минг сўм) миқдорида жарима белгиланган.
Бундан ташқари, ходимларга нисбатан ҳақоратли муносабатда бўлингани юзасидан унинг хатти-ҳаракатларини Одоб-ахлоқ комиссиясида кўриб чиқиш масаласи бўйича Қашқадарё вилояти ҳокимлигига тақдимнома киритилган.
Давлат меҳнат инспекцияси иш берувчиларни меҳнат қонунчилиги талабларига қатъий риоя этишга чақирди.
