AQSh Senati Eron bilan urushni to‘xtatish haqidagi rezolyutsiyani qabul qildi

AQSh Senati Eronga qarshi harbiy harakatlarni yakunlash va Amerika qo‘shinlarini jangovar operatsiyalardan olib chiqishga chaqiruvchi rezolyutsiyani qabul qildi. Hujjatni 50 senator qo‘llab-quvvatlagan bo‘lsa, 48 senator unga qarshi ovoz bergan. Bu haqda Bloomberg xabar berdi.

 

Ma’lum qilinishicha, rezolyutsiya Donald Tramp ma’muriyatini Kongress ruxsatisiz olib borilayotgan harbiy operatsiyalarni to‘xtatishga chaqiradi. Hujjatda Amerika harbiy kuchlari Eronga qarshi jangovar harakatlardan chiqarilishi lozimligi qayd etilgan.

 

Ovoz berish jarayonida hukmron Respublikachilar partiyasining to‘rt nafar a’zosi rezolyutsiyani qo‘llab-quvvatlagan. Demokratlar orasida esa faqat bir senator hujjatga qarshi ovoz bergan. 

 

Avvalroq shunga o‘xshash rezolyutsiya AQSh Vakillar palatasi tomonidan ham ma’qullangandi.

 

Biroq mutaxassislarning ta’kidlashicha, mazkur rezolyutsiya tavsiyaviy xarakterga ega bo‘lib, huquqiy majburiy kuchga ega emas. U Kongress a’zolarining siyosiy pozitsiyasini ifodalaydi va ijro hokimiyati tomonidan bajarilishi shart hisoblanmaydi.

 

Rezolyutsiyada AQSh qurolli kuchlarining Eronga qarshi operatsiyalarda ishtiroki faqat Kongress roziligi mavjud bo‘lgan yoki mamlakat hamda uning ittifoqchilarini himoya qilish zarurati yuzaga kelgan holatlardagina davom ettirilishi mumkinligi ta’kidlangan.

 

Shu bilan birga, Vashington va Tehron o‘rtasidagi diplomatik muloqotlar ham davom etmoqda. Xususan, Shveytsariyaning Byurgenstok shahrida Qatar va Pokiston vositachiligida o‘tkazilgan muzokaralarda tomonlar keskinlikni kamaytirish va keyingi texnik muzokaralar uchun asos yaratishga qaratilgan qator masalalarni muhokama qilgan.