“Armiya qurollari Kremlga qaratiladi”: Rossiyalik harbiy Putinga murojaat yo‘llab, tahdid qildi

Kreml Ukrainadagi urushda qatnashgan rossiyalik harbiy faxriy Aleksandr Luninning Prezident Vladimir Putinga yo‘llagan videomurojaatini o‘rganishini ma’lum qildi. Bu haqda Reuters xabar berdi.

 

Ma’lum qilinishicha, videoda u Rossiya qo‘mondonlarini askarlarni "o‘limga olib keluvchi buyruqlarni" bajarmagani yoki qo‘mondonlarga pul berishdan bosh tortgani uchun qiynoqqa solish va o‘ldirishda ayblagan.

 

Kreml matbuot kotibi Dmitriy Peskovning aytishicha, videomurojaat hali ko‘rib chiqilmagan, biroq unda "ancha g‘alati iboralar" mavjudligi sababli avvalo uning mazmuni o‘rganiladi.

 

Reuters xabariga ko‘ra, Lunin videomurojaatida minglab rossiyalik harbiylar buyruqlarni bajarishdan yoki qo‘mondonlariga pul berishdan bosh tortgani uchun maxsus chuqurlarda saqlanayotganini, keyinchalik qiynoqqa solinib o‘ldirilayotganini, so‘ng esa ularning "jang vaqtida bedarak yo‘qolgani" haqida yolg‘on ma’lumot berilayotganini da’vo qilgan.

 

Biroq videoda ushbu da’volarni tasdiqlovchi dalillar, shuningdek, jabrlanuvchilar yoki ayblanayotgan shaxslarning ismlari keltirilmagan. Reuters ham bu ma’lumotlarni mustaqil ravishda tasdiqlay olmaganini qayd etgan.

 

Voronej viloyatida yashovchi Lunin videoni harbiy kiyimda va medallari bilan yozib olgan. U, agar yaqin vaqt ichida Prezident Putin bilan jonli efirda shaxsan uchrashmasa, "armiya qurollarini Kreml tomonga burishi" haqida tahdid qilgan.

 

Ma’lumotlarga ko‘ra, videomurojaat Instagram tarmog‘ida 24 soat ichida 12 milliondan ortiq marta tomosha qilingan. Instagram Rossiyada taqiqlangan bo‘lib, undan asosan VPN orqali foydalanish mumkin.