Ukraina Rossiyaning “Vtorovo” neft stansiyasiga zarba berganini ma’lum qildi

Ukraina Xavfsizlik xizmati (SBU) 27-iyun kuni Vladimir viloyatida joylashgan “Vtorovo” neft haydash stansiyasiga Ukraina dronlari tomonidan zarba berilganini ma’lum qildi. Bu haqda Meduza nashri xabar berdi.

 

SBU ma’lumotiga ko‘ra, bu iyun oyi davomida mazkur stansiyaga uyushtirilgan ikkinchi hujum hisoblanadi. Dastlabki ma’lumotlarga ko‘ra, dronlar obyektning texnik binosiga zarba bergan va shundan so‘ng portlash sodir bo‘lgan.

 

Shu bilan birga, Ukraina tomoni hujum sodir bo‘lganini tasdiqlovchi foto yoki videolarni e’lon qilmagan. Vladimir viloyati rasmiylari ham voqea yuzasidan hozircha rasmiy izoh bermagan.

 

NASAning FIRMS sun’iy yo‘ldosh monitoringi tizimi ma’lumotlariga ko‘ra, neft haydash stansiyasi hududida yong‘in qayd etilmagan. Biroq tizim stansiyadan taxminan 10 kilometr uzoqlikda yong‘in sodir bo‘lganini qayd etgan.

 

“Vtorovo” neft haydash stansiyasi “Transneft-Verxnyaya Volga” kompaniyasiga tegishli. SBU ushbu obyektni yengil neft mahsulotlarini eksport portlariga hamda ichki iste’molchilarga yetkazib beruvchi muhim logistika markazi deb ta’riflagan. Xususan, mazkur stansiya orqali neft mahsulotlari Moskvaga ham yuboriladi.

 

Ma’lumotlarga ko‘ra, SBU ushbu stansiyaga bundan avval 10-iyun kuni ham dronlar orqali hujum uyushtirgan.

 

Ukraina urush davomida Rossiyaning neft infratuzilmasi obyektlariga muntazam zarbalar berib kelmoqda. Nashr qayd etishicha, bu hujumlar fonida Rossiyaning ayrim hududlarida yoqilg‘i taqchilligi kuzatilayotgani va aholi tomonidan benzin tanqisligi yuzasidan shikoyatlar bildirilayotgani aytilmoqda.