Prezident Shavkat Mirziyoyev XJV boshqaruvchi direktorining o‘rinbosarini qabul qildi
O‘zbekiston Prezidenti Xalqaro valyuta jamg‘armasi bilan sheriklikni kengaytirish muhimligini ta’kidladi.
O‘zbekiston Respublikasi Prezidenti Shavkat Mirziyoyev 29-iyun kuni Xalqaro valyuta jamg‘armasi “Shveysariya guruhi”ning navbatdagi yig‘ilishida ishtirok etish uchun mamlakatga kelgan jamg‘arma boshqaruvchi direktorining o‘rinbosari Bo Lini qabul qildi.
Uchrashuv avvalida Bo Li davlat rahbariga Xalqaro valyuta jamg‘armasi boshqaruvchi direktori Kristalina Georgiyevaning samimiy salomi va eng ezgu tilaklarini yetkazdi. Global moliya bozorlarining bugungi holati va rivojlanish istiqbollari muhokama qilindi.
Ushbu nufuzli xalqaro institut bilan amaliy hamkorlikni, eng avvalo, o‘tgan yil sentabr oyida Nyu-York shahrida Xalqaro valyuta jamg‘armasi rahbari bilan o‘tkazilgan uchrashuvda erishilgan kelishuvlar doirasida yanada mustahkamlashning asosiy jihatlari ko‘rib chiqildi.
O‘zbekistonda pul-kredit, valyuta va fiskal siyosatni takomillashtirish kabi yo‘nalishlarda amalga oshirilayotgan keng ko‘lamli islohotlarda jamg‘arma muhim o‘rin tutishi qayd etildi.
Makroiqtisodiy siyosat strategiyasi va raqamli to‘lovlar tizimini rivojlantirish, kapital harakatini liberallashtirish, milliy statistika metodologiyasi va davlat daromadlarini boshqarishni takomillashtirish hamda erkin valyuta ayirboshlash kursini qo‘llab-quvvatlash masalalarida ekspertlik va texnik ko‘makni yanada kengaytirish zarurligi ta’kidlandi.
Mamlakatning iqtisodiy idoralari uchun kadrlar tayyorlash dasturlarini rivojlantirish masalasiga alohida e’tibor qaratildi.
