Qirg‘izistonda Milliy xavfsizlik davlat qo‘mitasi raisi o‘zgardi

Qirg‘iziston prezidenti Sadir Japarov mamlakat Milliy xavfsizlik davlat qo‘mitasi (MXDQ) raisi Jumg‘albek Shabdanbekovni lavozimidan ozod etdi. Bu haqda prezidentning rasmiy saytida ma’lum qilindi.

 

Prezident farmoniga ko‘ra, Shabdanbekovni lavozimidan ozod etish to‘g‘risidagi qaror uning boshqa lavozimga o‘tkazilgani munosabati bilan qabul qilingan.

 

Shuningdek, Sadir Japarov Qirg‘iziston bosh prokurori Maqsat Asanaliyevning iste’fosini qabul qildi va uni Milliy xavfsizlik davlat qo‘mitasi raisi vazifasini bajaruvchi etib tayinladi.

 

“Qirg‘iziston Respublikasi Prezidenti Sadir Japarov imzolagan Farmonga muvofiq, Qirg‘iziston Respublikasi Konstitutsiyasining 70-moddasi 1-qismi 2-bandi va 71-moddalariga muvofiq Maksat Kubatovich Asanaliyev Qirg‘iziston Respublikasi Milliy xavfsizlik davlat qo‘mitasi raisi vazifasini bajaruvchi etib tayinlandi. Qirg‘iziston Respublikasi Milliy xavfsizlik davlat qo‘mitasi raisi lavozimiga Asanaliyev Maksat Kubatovichning nomzodi tasdiqlash uchun Qirg‘iziston Respublikasi Jo‘qorg‘i Kengashiga taqdim etiladi”, — deyiladi xabarda.

 

Ma’lumot o‘rnida, 2026-yilning fevralida, Qamchibek Tashiyev ishdan olinganidan keyin Shabdanbekov Qirg‘iziston Milliy xavfsizlik davlat qo‘mitasi raisi vazifasini vaqtincha bajaruvchi etib tayinlangandi.

 

Qamchibek Tashiyev o‘shanda ishdan bo‘shatilishini kutmaganini aytgan. Qirg‘iziston prezidenti esa Tashiyev davlat xizmatiga qaytmasligini bildirgan. Jogorku Kenesh deputati Elvira Surabaldiyeva sobiq MXDQ rahbari davlat to‘ntarishiga urinishni tashkil qilgani sabab lavozimidan chetlatilganini ma’lum qilgandi.

 

Qamchibek Tashiyev hokimiyatni zo‘rlik bilan egallashga tayyorgarlik ko‘rish hamda mansab vakolatini suiiste’mol qilishda ayblanmoqda. Ish doirasida yana yetti nafar sobiq amaldor, jumladan, sobiq bosh prokuror Kurmankul Zulushev va sobiq parlament spikeri Nurlanbek Turg‘unbek uulu ham sudlanmoqda.