Qirg‘izistonda Qamchibek Tashiyev va yana yetti nafar ayblanuvchiga 9 yil qamoq so‘raldi
Prokuratura hokimiyatni zo‘rlik bilan egallashga tayyorgarlik ko‘rganlikda ayblanayotgan sobiq amaldorlarga qat’iy jazo talab qildi.
Qirg‘izistonda davlat to‘ntarishiga urinish ishi bo‘yicha prokuratura barcha ayblanuvchilarni aybdor deb topish hamda ularga 9 yildan ozodlikdan mahrum qilish jazosi tayinlanishini so‘radi. Bu haqda sudlanuvchilardan birining advokati Ikramidin Aytqulov ma’lum qildi.
Uning so‘zlariga ko‘ra, sud jarayonida tomonlarning yakuniy muzokaralari boshlangan va davlat ayblovchisi ish bo‘yicha barcha ayblanuvchilarga bir xil muddatdagi qamoq jazosini talab qilgan.
Mazkur ishning asosiy ayblanuvchilaridan biri Qirg‘iziston Milliy xavfsizlik davlat qo‘mitasining sobiq raisi Qamchibek Tashiyev bo‘lib, u hokimiyatni zo‘rlik bilan egallashga tayyorgarlik ko‘rish hamda mansab vakolatini suiiste’mol qilishda ayblanmoqda.
Ish doirasida yana yetti nafar sobiq amaldor, jumladan, sobiq bosh prokuror Kurmankul Zulushev va sobiq parlament spikeri Nurlanbek Turg‘unbek uulu ham sudlanmoqda.
Jinoyat ishi maxfiylashtirilgan bo‘lib, sud majlislari dastlab yopiq tarzda o‘tkazilgan. Keyinchalik advokatlar talabi bilan ayrim tinglovlar ochiq o‘tkazilgan bo‘lsa-da, hozirda sud jarayoni yana yopiq tartibda davom etmoqda.
Eslatib o‘tamiz, Qirg‘iziston prezidenti Sadir Japarov joriy yil fevral oyida Kamchibek Tashiyevni Milliy xavfsizlik davlat qo‘mitasi raisi lavozimidan ozod qilgan edi.
Shundan so‘ng hukumatda keng ko‘lamli kadrlar almashinuvi amalga oshirildi. Bir qator vazirlar hamda yuqori lavozimli mansabdorlar lavozimidan ozod etildi. Mazkur voqealar fonida yangi prezidentlik saylovlarini o‘tkazish talabi bilan murojaat imzolagan ayrim jamoatchilik faollari va sobiq amaldorlar ham huquqni muhofaza qiluvchi organlar tomonidan hibsga olingan.
