Andijonda 15 yoshli qiz o‘zini kanalga tashlab, halok bo‘ldi
Janubiy Farg‘ona kanaliga o'zini tashlagan qizning jasadi bir kun o‘tib topilgan.
Andijon viloyatining Marhamat tumanida 15 yoshli qiz Janubiy Farg‘ona kanaliga o‘zini tashlab, halok bo‘ldi. Bu haqda Bosh prokuratura matbuot xizmati ma’lum qildi.
Qayd etilishicha, Marhamat tumani "Ershi" mahallasida yashovchi, 2010-yilda tug‘ilgan M.E. 2026-yil 30-iyun kuni taxminan soat 02:30 larda mahalla hududidan oqib o‘tuvchi Janubiy Farg‘ona kanali ustidagi avtomobil ko‘prigidan suvga sakragan va oqim uni olib ketgan.
O‘tkazilgan tezkor qidiruv ishlari davomida voyaga yetmaganning jasadi 1-iyul kuni Janubiy Farg‘ona kanalining Farg‘ona viloyati Toshloq tumani hududidan oqib o‘tuvchi qismida topilgan.
Hozirda mazkur holat yuzasidan Marhamat tumani prokuraturasi tomonidan tergovga qadar tekshiruv harakatlari olib borilmoqda.
Eslatib o'tamiz, avvalroq Samarqand viloyatining Oqdaryo tumanida 42 yoshli fuqaro Qoradaryo daryosiga tushib ketgani oqibatida bedarak yo‘qolgani xabar qilingan edi.
