Samarqandda 42 yoshli erkak daryoga cho‘kib ketdi
Hozirda qutqaruvchilar tomonidan qidiruv ishlari olib borilmoqda.
Samarqand viloyatining Oqdaryo tumanida 42 yoshli fuqaro Qoradaryo daryosiga tushib ketgani oqibatida bedarak yo‘qolgan. Bu haqda viloyat Favqulodda vaziyatlar boshqarmasi matbuot xizmati ma’lum qildi.
Qayd etilishicha, hodisa 28-iyun kuni Oqdaryo tumanining "Istiqlol" mahalla fuqarolar yig‘ini hududidan oqib o‘tuvchi Qoradaryo daryosida sodir bo‘lgan. Dastlabki ma’lumotlarga ko‘ra, 42 yoshli fuqaro J. O. ehtiyotsizlik oqibatida daryoga tushib ketgan.
Hodisa yuzasidan Favqulodda vaziyatlar boshqarmasiga xabar kelib tushgach, qutqaruvchilar voqea joyiga jalb etilgan. Hozirda daryo hududida fuqaroni topish bo‘yicha qidiruv-qutqaruv ishlari uzluksiz davom ettirilmoqda.
Eslatib o‘tamiz, avvalroq Toshkent viloyatining Bo‘stonliq tumanida ham ikki nafar bola kanalga tushib ketishi oqibatida halok bo‘lgani haqida xabar berilgandi.
