Toshkentda bolalarga zo‘ravonlik qilingan xususiy bog‘cha yopilishi mumkin
Bog‘chada bolalarning og‘ziga mato tiqilgani va qo‘li eshik bilan qisilgani aks etgan videolar ortidan jinoyat ishi qo‘zg‘atildi.
Toshkent shahar maktabgacha va maktab ta’limi boshqarmasi Rayyan Kids Land nodavlat ta’lim tashkiloti faoliyati yuzasidan rasmiy ma’lumot berdi.
Qayd etilishicha, o‘tkazilgan o‘rganishlar davomida mazkur ta’lim tashkiloti tomonidan litsenziya talablari va shartlarining 6 ta holatda qo‘pol ravishda buzilgani aniqlangan. Jumladan, 24-iyun kuni tarbiyachi A.G. tomonidan tarbiyalanuvchilardan biriga nisbatan jismoniy va ruhiy zo‘ravonlik qilingani ham ushbu qoidabuzarliklar qatoriga kiritilgan.
Amaldagi qonunchilikka ko‘ra, nodavlat ta’lim tashkiloti tomonidan litsenziya talablari bir marotaba qo‘pol ravishda buzilib, bu fuqarolarning hayoti va sog‘lig‘iga zarar yetkazishiga sabab bo‘lgan taqdirda, litsenziyani bekor qilishga asos bo‘lishi mumkin.
Shu munosabat bilan Maktabgacha va maktab ta’limi vazirligi tomonidan Rayyan Kids Landga berilgan litsenziyani bekor qilish yuzasidan Toshkent tumanlararo iqtisodiy sudiga ariza kiritildi.
Eslatib o‘tamiz, Uchtepa tumanida joylashgan ushbu xususiy bog‘chada tarbiyachilarning bolalarga nisbatan nomaqbul munosabatda bo‘layotgani aks etgan videolar ijtimoiy tarmoqlarda keng tarqalgan edi. Videolarda ayrim bolalarga tazyiq o‘tkazilgani, bir bolaning og‘ziga mato tiqilgani va boshqasining qo‘li eshik bilan qisib qo‘yilgani aks etgan.
Holat yuzasidan Jinoyat kodeksining 110-moddasi (qiynash) alomatlari bilan jinoyat ishi qo‘zg‘atilgan. Ayrim tarbiyalanuvchilarning olgan tan jarohatlari bo‘yicha sud-tibbiy ekspertiza tayinlangan.
