Тошкентдаги хусусий боғчада тарбиячи боланинг оғзига мато тиқиб, зўравонлик қилди
Мактабгача ва мактаб таълими вазирлиги болаларга нисбатан қўпол муносабат ҳолатини назоратга олиб, ишчи гуруҳ тузилганини билдирди.
Тошкент шаҳридаги "Rayyona Kids" нодавлат мактабгача таълим ташкилотида тарбиячиларнинг болаларга нисбатан қўпол муносабатда бўлгани акс этган видеолар юзасидан Мактабгача ва мактаб таълими вазирлиги расмий муносабат билдирди.
Вазирлик маълумотига кўра, ижтимоий тармоқларда тарқалган видеоларда тарбиячиларнинг болаларга тазйиқ ўтказгани, жумладан, болалардан бирининг оғзига мато тиққани ҳамда яна бир боланинг қўлини эшик билан қисгани акс этган.
Қайд этилишича, мазкур ҳолат юзасидан барча тафсилотлар атрофлича ўрганилмоқда. Текширув якунларига кўра, касб этикаси ва амалдаги қонунчилик талабларини бузган ҳамда ҳолат учун масъул бўлган мактабгача таълим муассасаси ходимларига нисбатан қонуний чоралар кўрилади.
Шунингдек, вазирлик бундай ҳолатларга йўл қўйган ҳамда лицензия талабларига жавоб бермайдиган нодавлат мактабгача таълим ташкилотларининг лицензиясини бекор қилиш бўйича ҳам тегишли чоралар кўрилишини маълум қилди.
Ҳозирда ҳолат юзасидан ҳуқуқни муҳофаза қилувчи органлар вакиллари иштирокида ишчи гуруҳ тузилган бўлиб, суриштирув ишлари давом этмоқда.
