Rossiyada ayrim zapravkalarda amaldorlarga benzin navbatsiz berilmoqda
Saratov, Krasnodar, Chelyabinsk va Volgograd viloyatlaridagi ayrim yonilg‘i quyish shoxobchalarida davlat xizmatchilariga navbatsiz yoki xizmat guvohnomasi asosida benzin sotilayotgani aytilmoqda.
Rossiyaning Saratov, Krasnodar, Chelyabinsk va Volgograd viloyatlaridagi ayrim AYOQSHlarda davlat xizmatchilariga navbatsiz yoki alohida tartibda benzin sotilayotgani haqida xabarlar tarqaldi, deya ma'lum qildi Meduza.
Jumladan, Saratovdagi "Rosneft" yonilg‘i quyish shoxobchalaridan birida faqat xizmat avtomobillariga benzin quyilayotgani aytilmoqda. Bu imtiyozdan favqulodda xizmatlar xodimlari bilan bir qatorda tuman ma’muriyati, Davlat xizmatlari markazi va “Rossiya pochtasi” xodimlari ham foydalangan. Shuningdek, mijozlardan biri shunchaki “Hukumat” deb aytganidan so‘ng unga xizmat ko‘rsatilgan.
Jurnalistlarning ta’kidlashicha, ushbu yoqilg‘i shoxobchasida xaridorlardan hech qanday hujjat talab qilinmaydi. Shu bilan birga, bu yerda ham umumiy cheklov amal qiladi — bir avtomobilga sutkasiga 30 litrdan ortiq benzin quyilmaydi.
Krasnodarda esa shahar dumasi deputati Aleksandr Safronov e’lon qilgan videolarda ayrim “Rosneft” AYOQSHlarida benzin faqat xizmat guvohnomasini ko‘rsatgan davlat xizmatchilariga sotilayotgani aks etgan.
Shuningdek, Chelyabinsk–Yekaterinburg avtomobil yo‘lidagi yonilg‘i quyish shoxobchalaridan birida oddiy mijozlarga benzin yo‘qligi aytilayotgani, biroq davlat xizmatchilariga yonilg‘i sotish davom etayotgani xabar qilingan.
Volgograddagi “Gazprom” AYOQSHlaridan birida esa benzin faqat maxsus yonilg‘i kartasi egalari uchun sotilgani ma’lum qilingan. Bunday kartani istalgan fuqaro rasmiylashtirishi mumkin bo‘lsa-da, undan asosan favqulodda xizmatlar va mahalliy ma’muriyat xodimlari foydalanayotgani aytilmoqda.
Qayd etilishicha, Rossiyada so‘nggi haftalarda Ukraina dronlarining neft infratuzilmasiga hujumlari ortidan yoqilg‘i taqchilligi kuzatilmoqda. Mamlakatning ko‘plab hududlarida benzin sotuviga cheklovlar joriy etilgan va haydovchilar yonilg‘i quyish uchun uzoq navbatlarda turishga majbur bo‘lmoqda.
Shu bilan birga, Rossiya hukumati mamlakat ichki bozorida benzin taqchilligi jiddiy darajada emasligini ta’kidlamoqda.
